• Eth pròplèu dissabte 14 de junh entà meddia aurà lòc era prumèra jornada gastronomica de promocion dera codina aranesa a cargue de restaurants dera Val d’Aran en marc der Hestau “TerSon. Eth Son dera Tèrra”

• Eth govèrn d’Aran signaue setmanes endarrèr un convèni damb eth Grèmi d’Ostalaria dera Val d’Aran entà impulsar accions de promocion dera gastronomia deth territòri.

• Era jornada s’emmèrque tanben enes actes previsti en Aran laguens dera “Region Mondiau dera Gastronomia” prebotjada pera Generalitat de Catalunya.

Era gastronomia e es productes agroalimentàris dera Val d’Aran seràn es protagonistes dera jornada que se celebrarà ena 2au edicion der Hestau Culturau “TerSon” eth pròplèu 14 de junh entà meddia, ena plaça d’Aran de Vielha, deuant dera sedença deth Conselh Generau d’Aran.

“Gustaran” nèish deth compromís deth govèrn d’Aran damb eth Grèmi d’Ostalaria dera Val d’Aran, entà impulsar iniciatives qu’ajuden ara promocion e difusion dera gastronomia aranesa. Pr’amor d’aquerò, eth Conselh Generau d’Aran e eth Grèmi d’Ostalaria signauen eth passat mes de deseme un convèni de collaboracion entà méter en valor era gastronomia deth nòste territòri a trauès de dues accions annaus organizades de forma conjunta.

Atau madeish, “Gustaran” s’emmèrque tanben laguens des actes qu’era Generalitat de Catalunya a previsti per tot Catalunya entà celebrar eth nomentament coma “Region Mondiau dera Gastronomia”. Catalunya a estat era prumèra region europèa que recep aguest reconeishement que met de relèu un modèl toristic innovador e regeneratiu a on era gastronomia e era produccion alimentària locau prenen un papèr determinant.

“Gustaran” aurà lòc eth dia 14 de junh es 13,00 e es 15,00 ores ena plaça d’Aran, e i participaràn es restaurants: Urtau, Cal Manel, Triton, Turnay, Sidrería Pau, Era Coquèla, Es Arraïtzes e Refu qu’aufriràn petiti plats des sues cartes a un prètz de 5 e 6 euros.

Eth conselhèr de Torisme, Josep Canut a soslinhat: “Pendent era jornada son previstes demostracions culinàries, a on es codinèrs e codinères mostraràn com trebalhen es productes de proximitat dera Val d’Aran e com les transformen en plats modèrns e creatius”.

Vielha, 3 de junh de 2025