• Eth Plen deth Conselh Generau d’Aran a aprovat aué era regulacion tara eleccion des representants deth personau volontari des Pompièrs d’Aran qu’ostentaran era representacion deth collectiu volontari deuant dera rèsta d’estaments.

• Dempús dera creacion deth Còs de Pompièrs d’Aran, en marc deth desplegament competenciau deth traspàs en matèria d’emergéncies, escandiment de huecs, proteccion civila e prevencion, damb aguesta formalitat s’auance ena regulacion deth personau volontari d’aguest sector.

Era aprobacion dera norma reguladora dera eleccion e nomentament des persones representantes deth personau volontari deth Còs de Pompièrs d’Aran a coma objècte er establiment de totes es accions de besonh entara eleccion e nomentament des persones representants deth collectiu volontari deth Còs de Pompièrs d’Aran. Atau madeish, includís era designacion des persones responsables dera sua promocion e nomentament, era definicion deth cens electorau, eth procediment electorau, e era forma de resolucion des possibles reclamacions o impugnacions d’aguest.

“Damb aguesta norma artenhem un pas mès ena regulacion deth collectiu volontari enes Pompièrs d’Aran dempús d’auer artenhut eth traspàs competenciau n’aguest domeni e desvolopar eth sistèma pròpri d’emergéncies a trauès de personau laborau” a afirmat era sindica d’Aran, Maria Vergés.

Atau madeish, eth Govèrn d’Aran, conscient dera importància deth volontariat enes Pompièrs d’Aran e, atau coma remèrque tanben era Lei d’Aran, impulsarà a trauès de Pompièrs Emergéncies es formalitats entà desvolopar aquerò que remèrque era creacion deth Còs, coma pòden èster era convocatòria de places de volontariat o era aufèrta de formacion de besonh, qüestions que son tanben condicionades ara disponibilitat de finançament.

Vielha, 13 març de 2026