Ager deluns, 18 d’agost, era fòrta tempèsta damb aparelh electric e era peiregada afectèc eth tèrme municipau de Vielha e Mijaran (Val d’Aran). A conseqüéncia der impacte d’un relampit, moriren mès de 200 oelhes que peishien pes entorns deth camin deth Pòrt de Vielha, apròp dera boca sud deth tunèl de Vielha.

Ua part importanta deth bestiar ère en madeish camin deth Pòrt de Vielha, qu’en aguestes dates ei fòrça freqüentat.

Maugrat que eth Vicesindic 1èr. e conselhèr deth Departament de Territòri, Paisatge e Cambi climatic, Francisco Bruna, tecnics deth Conselh Generau d’Aran e es madeishi pagesi an procedit a trèir es cadavres deth carrèr, quauqui endrets deth camin an estat afectadi.

Per motius de seguretat e salubritat, eth Conselh Generau d’Aran a modificat leugèrament eth traçat e a senhalizat ua alternativa temporau entà non auer de passar per endret a on i a mès acumulacion de bestiar mòrt.

Se recomane evitar, tant que se pogue, eth pas peth camin deth Pòrt de Vielha en endret que i a mès apròp dera val de Molières, sustot aguestes prumères setmanes, e circular peth pas alternatiu senhalizat entà non auer de passar pera zòna damb mès acumulacion de cadavres.

Eth govèrn d’Aran a mostrat eth sòn supòrt as pagesi afectadi.

Vielha, 19 d’agost de 2025