• Eth Plen deth Conselh Generau d’Aran celebrat aguest maitin a aprovat de manèra iniciau, e per unanimitat, era modificacion des Normes Subsidiàries de Planejament dera Val d’Aran (NNSS.VA), vigentes enes municipis de Canejan, Les, Bossòst, Vilamòs, Es Bòrdes e Vielha e Mijaran relativa ara regularizacion des usatges e bastisses admissibles en solèr non urbanizable.

• Aguesta modificacion s’amie a tèrme deuant deth besonh d’adaptar es disposicions des NNSS.VA as deth Plan Director Urbanistic dera Val d’Aran (PDUVA) e balhar respòsta as diuèrses problematiques relacionades damb es usatges e es bastisses en solèr non urbanizable que s’an accetuat enes darrèri ans, coma era proliferacion de petites installacions, barratges o cubèrts.

• Era modificacion permeterà tanben definir e regular un tipe d’edificacion, emplaçabla en finques superiores a 2000m², que possibilite eth desvolopament d’explotacions agropequàries conforme as besonhs deth sector ramadèr aranés e ara estructura dera proprietat en Aran. 

• Un viatge finalizadi es placi oficiaus e aprovada definitivaments pera Comission d’Urbanisme d’Aran, seran es Ajuntaments aranesi es qu’auran de velhar peth compliment d’aguesta norma.

Aguest maitin a auut lòc un plen extraordinari deth Conselh Generau d’Aran entà aprovar, de manèra iniciau, era propòsta de modificacion des NNSS de Planejament dera Val d’Aran, vigentes enes municipis de Canejan, Les, Bossòst, Vilamòs, Es Bòrdes e Vielha e Mijaran entara regulacion des usatges e construccions admissibles en solèr non urbanizable.

Era modificacion des NNSS. VA nèish deth besonh d’adaptar aguesta normativa, de 1982, ath PDUVA e balhar atau madeish respòsta as diuèrses problematiques relacionades damb es usatges e bastiments en solèr non urbanizable (SNU) que s’an accetuat enes darrèri tempsi.

N’aguest sens, es NNSS.VA diferenciauen dus tipes de SNU: solèr rustic e solèr non urbanizable de proteccion especiau, mès eth PDUVA determine tres tipes de solèr en sistèma d’espacis dubèrti: solèr de proteccion especiau, de proteccion territoriau e de proteccion preventiva. Atau madeish, eth PDUVA definís e regule especificaments determinades construccions en SNU (ramadères e magazèms) que non an ua correspondéncia clara damb es construccions regulades pes NNSS.VA

Per un aute costat, era possibilitat d’impulsar ua progressiva recuperacion dera activitat agropequària pr’amor des limitacions dera estructura dera proprietat rustica en Aran, que non acostume a èster de dimensions granes e, per tant, son pòques es finques qu’an es condicions de situacion e dimensions que requerien es NNSS.VA tara implantacion d’installacions ramadères, era modificacion cree ua tresau figura que ven a completar es dues dejà existentes: era dera bòrda tradicionau e era dera edificacion en parçans de mès de 5000m². Atau donc, ara se poderàn definir e regular un tipe d’edificacion emplaçabla en finques de dimension superiora as 2000m² que possibilitarà eth desvolopament d’explotacions agropequàries conforme as besonhs deth sector e ara estructura dera proprietat dera Val d’Aran.

D’autes des qüestions qu’incorpòre aguesta modificacion des NNSS.VA ei tanben es relacionades damb es movements de tèrres, terrèrs e murs de contencion de besonh tar emplaçament de naui bastiments atau coma era regulacion avienta dera integracion des elements de captacion d’energia solara enes construccions admissibles en SNU.

Finauments, era naua normativa intègre tanben era compatibilitat entre eth respècte e preservacion deth paisatge damb era implantacion de petites installacions vinculades ar emplec domestic e familhar de tèrres o ramaderia, sense activitat economica, coma barratges o petiti cubèrts entà utisi o pòqui caps de bestiar. Era manca de normativa ath respècte a portat, pendent es darrèri ans, ara proliferacion d’installacions irregulares emplaçades precàriaments e hètes damb materiaus sense integracion en entorn.

Aguesta modificacion tanben ven acompanhada d’ua ficha, que tot e non èster un modèl obligatòri enes instàncies de sollicitud, facilitarà era aportacion de documentacion, eth contròle administratiu corresponent, eth compliment dera naua regulacion e, coma aspècte fonamentau, eth desvolopament d’ua imatge d’aguest tipe d’intervencions unificada e respectuosa damb eth paisatge.

Entara sindica d’Aran “aguesta aprobacion ei ua hita de grana transcendéncia entath nòste país, pr’amor que, dempús de decades d’innaccion, auem artenhut eth consens des administracions entà hèr un important pas en mantenement e conservacion deth nòste paisatge e de supòrt tanben ath sector ramadèr”, e higie que “damb açò se met a disposicion des Ajuntaments aranesi un esturment de gestion entà que poguen auer claretat juridica entà hèr a complir aguesta normativa”.

Aguesta modificacion se hig ara dejà amiada a tèrme per Ajuntament de Naut Aran, e demorarà per resoler-se enes Ajuntaments d’Arres e Bausen que non an sollicitat era sua addesion ad aguest tràmit.

Vielha, 29 de mai de 2025