Se pòt veir en dirècte a Tòn en circuit de Gran Prix que se desvolope ena localitat Chèca d’Ostrava (http://www.youtube.com/isujuniorgrandprix)
Era escassa experiéncia ena competicion internacionau non joguèc en contra deth joen patinador aranés de 16 ans qu’afrontèc era sua prumèra pròva deth circuit de Gran Prix Júnior celebrada en Ljubljana (Eslovènia) damb un notable naut.
Destacabla siguec era sua participacion en programa cuert, a on melhorèc era sua melhor nòta personau, en tot arténher 50.49 punts, e en tot arténher era nòta minima entà poder participar en de Mondiau Júnior. Ath dia següent, Tòn afrontèc eth programa long damb coratge, encara qu’es causes non li sigueren tan plan coma eth prumèr dia. Tot e atau, eth patinador de Vielha establit en Barcelona, arresponec e non s’enfonsèc, en tot arténher era 15au posicion finau que mès d’un auesse signat abans dera realizacion dera competicion e en tot arténher ua puntuacion finau de 134,37 punts.
Eth pòdium dera pròva siguec aucupat peth chinés Jin Boyang qu’artenhec er aur, e es russi Petrov Alexander e Aliev Dimitri que se portèren er argent e eth bronze respectivaments. Participèren ath delà esportistes americani, canadians e japonesi qu’aucupèren es següentes places ena competicion e que son ua mòstra der anautit nivèu que i auec en aguesta pròva.
Eth patinador siguec acompanhat pera entrenadora italiana Franca Bianconi damb qui a trabalhat pendent un mes e miei ena localitat de Roana (Itàlia), e qui acompanhèc tanben as membres dera prestigiosa equipa italian. Es valors d’aguest patinador elegant e capable de transméter emocions, heren que siguesse un des mès aplaudidi ena sua participacion.
A compdar d’aué dijaus, dia 4 de seteme, Cónsul harà concurréncia nauaments en circuit de Gran Prix ena localitat Chèca d’Ostrava a on ei previsible que melhore eth resultat. Aquiu serà acompanhat peth sòn entrenador deth Fotbòl Club Barcelona, Patrick Capmartin.
Era competicion pòt seguir-se eth dirècte en Canau de Youtube dera ISU http://www.youtube.com/isujuniorgrandprix