Eth RCD Espanyol seguís confidant ena Val d’Aran

Un an mès, era prumèra equipa harà era sua pretemporada en Garòs e er Espanyol B e eth Femenin, s’installaran en Vielha.

RCD ESPANYOL 2015Era conselhèra de Torisme, Comèrç e Consum, Anna Díaz, eth president deth RCD Espanyol, Joan Collet, e eth baile deth Naut Aran César Ruiz-Canela.

Ua confidança solida, açò ei çò que sentís e demòstre eth RCD Espanyol envèrs era Val d’Aran coma emplaçament entà amiar a tèrme es pretemporades des sues principaus equipes. E ei qu’eth club a anonciat que per tresau an consecutiu era prumèra equipa harà eth sòn stage de preparacion entara sason que ven en Garòs. Pera sua banda, eth Femenin e er Espanyol B se lotjaràn en Vielha per dusau pretemporada consecutiva. Es tres stages encara se trapen barrant es dates definitives mès seràn, coma ei abituau, ath long der ostiu e mercaràn er inici dera sason esportiua 2015-16 entàs tres principaus equipes blanc-e-blus.

Era apòsta deth club pera Val d’Aran se fondamente enes multiples possibilitats qu’aufrís eth marc naturau incomparable d’aguesta val pirenenca, un territòri damb ua personalitat istorica, un clima e ua cultura de vida plan pròpris e singulars. Ath delà, er entorn aufrís as equipes lotjaments preparadi e eth camp de fotbòl municipau de Naut Aran, en Garòs, a on es fotbolistes tornen a exercitar-se entà iniciar eth cors esportiu dera melhora manèra possibla.

Eth RCD Espanyol se mòstre capinaut de poder seguir realizant per 13au sason consecutiva eth sòn stage de preparacion en Catalonha. En aguest sens, arregraís era collaboracion e compromís ath Conselh Generau d’Aran, presidit peth sindic d’Aran, Carlos Barrera, e per totes es institucions implicades en aguest acòrd coma er Ajuntament de Vielha e Mijaran, damb Àlex Moga coma baile, e ar Ajuntament de Naut Aran, presidit peth sòn baile, César Ruiz-Canela. Aguest darrèr, amassa damb era conselhèra de Torisme, Comèrc e Consum deth Conselh Generau, Anna Díaz, an sagerat aguesta confidança per ua sason mès entre era Val d’Aran e eth RCD Espanyol damb ua visita as installacions deth Power8 Stadium, a on an estat arrecebudi peth president deth club, Joan Collet.

 

Era amassada a servit entà corroborar era bona sintonia entre ambdues parts, ratificada peth president Joan Collet, qu’a arregraït as autoritats araneses “era comoditat e era dedicacion damb era que tota era Val d’Aran acuelh as nòsti equipes cada ostiu”. Collet a afirmat qu’“aguest compromís mos aumplís d’orgulh pr’amor que mos cònste qu’es nòsti equipes trabalhen fòrça a gust en Garòs e demòstre era volontat der Espanyol de potenciar eth bon e melhor qu’a Catalonha, e Aran, sense dobte, n’ei un gran exemple en fòrça encastres”.

Pera sua part, enes declaracions a Espanyol TV, era conselhèra Anna Díaz a afirmat qu’“era Val d’Aran apòste pera promocion a trauès der espòrt d’elèit e que venguen clubs d’elèit coma er Espanyol ei fòrça important entà nosati”. Díaz, ath delà, a arregraït era imatge d’ua Val d’Aran de referéncia entar espòrt, era natura e era salut que se projècte dera man deth RCD Espanyol. Un arregraïment ratificat tanben peth baile de Naut Aran, César Ruiz-Canela, qu’a afirmat que “tant de bon eth club pogue vier fòrça mès ans entara Val d’Aran e en Naut Aran pr’amor que seràn tostemp fòrça ben arrecebudi”, mentre non dobtaue en meter-se era samarreta blanca-e-blu qu’eth club l’ac a autrejadi coma present.

Declaracions en Espanyol TV:  https://www.youtube.com/watch?v=fvY7WvcEeBc

Comments are closed.