Vielha, 1 de març de 2017.- Pendent era darrèra setmana es agents deth departament d’Agricultura, Ramaderia e Miei Naturau e era patrolha os deth Conselh Generau d’Aran an detectat es prumèrs movements d’ossi dempús deth periòde d’ibernacion.

Per un costat, s’an observat rastres ena nhèu ena val de Toran, aparentaments d’un mascle qu’auie d’ibernar en bèra zòna pròplèu. Per d’auta part, a principi de setmana, se comuniquèc ua observacion d’un individu que podec èster fotografiat, tanben ena zòna deth Baish Aran.

Fin finau, eth seguiment GPS deth mascle Goiat, liberat pera Generalitat en marc deth programa Piroslife, a permetut constatar petiti movements exploratòris a quauqui centenats de mètros dera cauva d’ibernacion, plaçada en ua zòna inaccesibla deth Baish Aran. Es femelhes, sustot s’an cries, demoraràn ues setmanes mès laguens era cauva, dera que non sòlen gésser enquiath mes d’abriu, en foncion dera meteorologia.