• Era Hèsta aurà lòc eth 5 de deseme en Palai d’Espòrts de Vielha e vò èster un espaci de trobada e reconeishement ath trabalh des entitats e clubs esportius, e tanben de totes es persones que contribuïssen cada dia a hèr a créisher er espòrt ena Val d’Aran.

Eth Conselh Generau d’Aran, a trauès deth Departament d’Espòrts, organize era 1èra Hèsta der Espòrt Aranés, un eveniment que nèish damb era volontat de méter en valor eth papèr der espòrt ena societat aranesa e, especiaument, reconéisher eth trabalh, era dedicacion e eth compromís des entitats e clubs esportius deth territòri.

Era celebracion aurà lòc eth 5 de deseme de 2026 en Palai d’Espòrts de Vielha e se vò convertir en un espaci de trobada, participacion e celebracion collectiva, dubèrt ath conjunt der espòrt aranés e ara societat.

Aguesta prumèra edicion se vò centrar enes entitats e clubs que, damb eth sòn trabalh diari, hèn possibla ua aufèrta esportiva rica e diuèrsa en tot eth territòri; es esportistes, es tecnics e tecniques, eth volontariat e totes es persones que, d’ua manèra o ua auta, contribuïssen ath sòn desvolopament.

Era Hèsta serà tanben ua oportunitat entà reconéisher publicament eth trabalh des entitats e clubs esportius, eth sòn impacte ena vida des pòbles e era sua aportacion ath benèster collectiu. Un trabalh que va fòrça mès enlà dera organizacion d’activitats esportives e que contribuís a crear comunautat, generar oportunitats, educar en valors e fomentar abituds de vida saludables.

Er espòrt ei quauquarren mès qu’ua practica fisica. Ei salut, educacion, inclusion, esfòrç, convivéncia, amistat e transmission de valors. En un territòri com Aran, ei tanben un element de coesion territoriau, d’identitat e de vinculacion damb eth nòste entorn naturau.

Per aguest motiu, aguesta prumèra edicion vò èster eth començament d’un espaci compartit entà celebrar aquerò qu’auem bastit amassa, dar visibilitat ath trabalh que se hè cada dia e poder impulsar er espòrt com un element fondamentau entath present e eth futur dera Val d’Aran.

Eth conselhèr d’Espòrts deth Conselh Generau d’Aran, Javier Cavero, a volut relheuar era importància dera iniciativa: «Damb aguesta prumèra Hèsta volem reconéisher e méter en valor eth trabalh de totes es entitats e clubs que, damb fòrça dedicacion e implicacion, hèn possible er espòrt en Aran. E hig: “Darrèr de cada club, de cada activitat e de cada esportista i a fòrça persones que trabalhen cada dia, soent de manèra desinteressada, entà aufrir oportunitats, transméter valors e hèr comunitat. Aguesta Hèsta ei ua manèra de dar-les es gràcies, de compartir aquerò que mos amasse e de bastir amassa eth futur der espòrt aranés”. Entath conselhèr: “era nòsta volontat ei qu’aguesta iniciativa age continuitat en temps e se consolide com ua trobada annau de referéncia, un espaci d’amassada e reconeishement a on toti es que hèm part der espòrt aranés mos pogam veir representadi e participar en aguest projècte collectiu”.

Aran en Moviment, er espòrt, motor de present e futur.

Eth lèma d’aguesta prumèra edicion resumís era sua esséncia: reconéisher eth camin hèt, arregraïr as persones qu’ac hèn possible e bastir amassa un territòri mès actiu, saludable e comprometut damb er espòrt.

Vielha, 07 de noveme 2026