1.200 inscriti ena dusau edicion dera Trail Vielha-Molières 3010

Vielha, 13 de junhsèga de 2018.- Deman dissabte 14 de junhsèga se celebrarà era dusau edicion dera Trail Vielha-Molières 3010, qu’est an passat ena sua prumèra edicion compdèc damb era participacion de 700 inscriti que quasi s’an doblat ena edicion d’enguan que compdarà damb 1.200 participaires.

Era carrèra que participaràn en eth corredors locaus e nacionaus, ath delà d’esportistes de desparièrs païsi d’Euròpa coma França, Belgica, Suècia o Ucraïna entre d’auti, cònste de 3 modalitats: era Molières Maraton de 42 kms, damb 545 participaires, era Montpius Skyrace 23km, damb 453 inscriti, e era Tuca Trail, de 11 kms, damb 190 corredors.

Era Trail Vielha-Molières 3010 ei organizada peth Centre Trail Val d’Aran, eth Club Excursionista d’Aran e er Ajuntament de Vielha e Mijaran e compde damb era collaboracion deth Conselh Generau d’Aran, Torisme Val d’Aran e es Volentaris Val d’Aran.

Era conselhèra de Torisme d’Aran, Anna Díaz, qu’assistirà ar acte de presentacion dera pròva a explicat qu’entath Conselh Generau d’Aran ei important poder collaborar e dar supòrt a eveniments esportius coma aguest que compden damb ua grana participacion e que reafirmen era Val d’Aran coma destinacion de referéncia de corses de nauta montanha.

Es organizadors dera Trail Vielha-Molières 3010 calculen un impacte economic de retorn ath torn de 300.000 €.

 

Hònt e Fòto: Centre Trail Val d’Aran

Comments are closed.