• Era finalitat d’aguest bootcamp (ua formacion fòrça intensa que s’amie a tèrme pendent ua setmana) ei era d’atrèir a emprenedors e emprenedores ath nòste territòri entà que poguen compdar damb eth temps e assessors/es de besonh entà reflexionar sus eth sòn negoci e trapar idèes emprenedores en territoris de montanha

Eth Hub d’innovacion en zònes ruraus de montanha deth Conselh Generau d’Aran (HèPic) a organizat, pendent es dies 26 de seteme e 3 d’octobre, un bootcamp ena Val d’Aran dirigit a persones innovadores e emprenedores, entà que poguen descobrir era capacitat d’emprenediment des territòris de montanha coma eth nòste.

Bootcamp ei eth tèrme damb eth que se coneish a ua formacion fòrça intensa que s’amie a tèrme pendent un cuèrt periòde de temps, en aguest cas, ua formacion dirigida a persones innovadores e emprenedores.

“Eth govèrn deth Conselh Generau d’Aran cerque, der inici dera legislatura ençà, impulsar era diversificacion economica mejançant era innovacion e era atraccion e retencion deth talent joen”, afirmaue era sindica d’Aran, Maria Vergés, “a trauès de HèPic auem era possibilitat de implementar projèctes innovadors e sostenibles damb impacte positiu enes zònes de montanha coma era Val d’Aran, en tot generar ua activitat socioeconomica diversificada”.

En aguest cas, a trauès deth bootcamp “Redesconecta”, se vò aufrir as emprenedors e emprenedores que participen ua vision diferenta dera imatge tradicionau deth mon rurau, en tot demostrar es possibilitats des territòris de montanha. S’amiaràn a tèrme diferentes activitats coma talhèrs de inteligéncia collectiva, networking, charrades sus emprenediment en zònes de montanha o visites organizades a negòcis dera Val d’Aran, entre d’autes.

Es places son limitades a 10 persones e eth prètz ei de 315 euròs (lotjament damb mieja pension, seminaris e visites inclodides). Entà inscriuer-se sonque cau escríuer ar email info@hepic-hub.com.