• Es naui contenedors an mès capacitat e un dessenh mès modèrn, que permeterà melhorar eth servici de recuelhuda de residus e era imatge des pòbles aranesi.

Eth Conselh Generau d’Aran a començat era implantacion progressiva de naui contenedors de residus enes diferenti pòbles dera Val d’Aran, ua operacion que represente un pas important ena modernizacion deth servici de recuelhuda e ena melhora dera imatge des espacis publics deth territòri.

Es naui contenedors, fabricadi pera empresa Nord Engineering, subergessen pera sua màger capacitat d’emmagazinatge, eth sòn dessenh modèrn e foncionau e ua estetica cuedada que permeterà integrar-les de manèra mès armoniosa en entorn urban des pòbles aranesi.

Aguest renauiment respon ath besonh de modernizar es infrastructures de remassada de residus, damb er objectiu d’adaptar-les as besonhs actuaus dera populacion e melhorar tant era eficacitat deth servici coma era qualitat des espacis publics.

Eth conselhèr de Gestion Ambientau deth Conselh Generau d’Aran, Oriol Sala, relhèue era importància d’aguesta intervencion: «Calie hèr aguest pas. En fòrça des nòsti pòbles auíem encara contenedors damb mès de trenta ans d’antiquitat, qu’an complit era sua foncion pendent tot aguest temps, mès que ja non responien as besonhs actuaus. Damb aguest renauiment volem aufrir un servici mès modèrn, eficient e adaptat ara realitat dera Val d’Aran».

Mès capacitat e ua melhor integracion en entorn

Un des principaus auantatges des naui contenedors ei era sua màger capacitat, que permeterà dispausar de mès espaci entà depositar-i es residus e melhorar eth foncionament des punts de recuelhuda, especiaument en aqueri endrets a on i a ua màger utilizacion deth servici.

Totun, aguesta substitucion va mès enlà dera melhora tecnica. Eth projècte tanben met er accent ena estetica e ena integracion des contenedors en paisatge urban, un aspècte especiaument important en un territòri com era Val d’Aran, a on era imatge des pòbles e eth suenh der entorn son part dera sua identitat.

«Es contenedors son elements que vedem cada dia, que son presents enes nòsti carrèrs e places e que, per aquerò, tanben son part dera imatge des nòsti pòbles. Non les podem considerar sonque recipients entà depositar residus, senon coma un element mès deth mobiliari urban. Volem que siguen foncionaus, que siguen

de mès capacitat, mès tanben que siguen polits, modèrns e que s’intègren adequadament en nòste entorn», explique Sala.

En aguest sens, eth conselhèr soslinhe que «suenhar era imatge dera Val d’Aran tanben vò díder prestar atencion as detalhs deth dia a dia. Dera madeisha manèra que suenham es nòsti carrèrs, es nòstes places e es nòsti jardins, tanben auem de suenhar es elements que ne formen part. Aguesta renovacion ei ua manèra mès de melhorar era qualitat des nòsti espacis publics».

Ua implantacion progressiva en tota era Val d’Aran

Era installacion des naui contenedors se hè de manèra progressiva enes diferenti nuclèus deth territòri, damb era volontat de renovar es punts de recuelhuda existents e aufrir ara ciutadania un servici mès modèrn, comòde e eficient.

Aguesta accion pren ua importància especiau en un territòri de montanha com era Val d’Aran, a on era dispersion des pòbles e er increment sasoèr dera populacion hèn de besonh dispausar d’infrastructures adequades e damb capacitat sufisenta entà respóner as besonhs deth servici.

«Eth nòste objectiu ei qu’aguesta melhora arribe en toti es pòbles dera Val d’Aran. Volem auer ues installacions que responguen as besonhs actuaus, tant des deth punt d’enguarda dera gestion des residus com dera imatge que volem entath nòste territòri», hig Oriol Sala.

Damb aguesta accion eth Conselh Generau d’Aran auance ena modernizacion des servicis publics e ena melhora des espacis urbans, damb ues infrastructures que combinen foncionalitat, capacitat e dessenh.

Ua intervencion que non sonque permeterà melhorar era recuelhuda de residus, senon tanben contribuïr a qu’es carrèrs e places dera Val d’Aran presenten ua imatge mès suenhada, ordenada e en armonia damb er entorn deth territòri.

Vielha, 30 d’octobre de 2026