• Era sindica d’Aran a començat ua ronda d’amassades damb representants de companhies de telefonia qu’opèren en Aran entà solicitar-les ua melhora dera cobertura e des servicis qu’aufríssen en nòste territòri, especiauments en Baish Aran, que patís tot soent talhs en servici.

Era Sindica d’Aran, Maria Vergés, s’amassèc ager damb eth director de relacions institucionaus de Telefónica España e damb representants en Catalunya dera companhia entà tractar sus era situacion ath torn dera cobertura telefonica, atau coma qüestions relacionades damb eth servici telefonic e damb eth desplegament dera fibra optica e er hilat 5G ena Val d’Aran.

“Actuauments era Val d’Aran se trape en plen procès de desplegament dera fibra optica e der hilat 5G per part des companhies telefoniques, mès aguest encara non s’a acabat de desvolopar” a manifestat era sindica d’Aran e higie que “eth nòste territòri, especiauments en Baish Aran, patís tot soent talhs en suministre de telefonia qu’afècten dirèctaments autant ara economia coma ara seguretat des persones, quauquarren qu’ei responsabilitat des companhies telefoniques solucionar e atau les ac auem trasladat”.

Er objècte d’aguestes amassades passe per conéisher er estat actuau des cobertures en territòri, especiauments en situacions d’emergéncies, entà evitar damb mesures preventives er isolament des pòbles d’Aran e poder atau èster en contacte damb era ciutadanetat en tot moment.

Ad aguest prumèr contacte damb Telefónica España, damb qui eth govèrn d’Aran s’a emplaçat a trabalhar entà detectar es punts mès importants de melhora entà qu’era companhia pogue implementar es solucions avientes, s’i higeran enes pròplèu setmanes amassades damb era rèsta d’operadores.

Vielha, 10 de seteme de 2025