• Eth Conselh Generau d’Aran, amassa damb quauqui clubs esportius dera Val d’Aran, Baqueira Beret e diuèrses institucions deth territòri, comence un an mès eth Programa de Tecnificacion Infantila d’Espòrts d’Iuèrn e Gèu, entà joeni esportistes de 12 a 16 ans que vòlen desvolopar eth sòn talent en disciplines d’esquí aupin, esquí de hons, snowboard, freestyle, freeride e patinatge sus gèu.

Aguest programa ei possible gràcies ara sinèrgia entre diuèrsi departaments deth Conselh Generau d’Aran, Aran Salut, er INS d’Aran, er Ajuntament de Vielha, es clubs aranesi e Baqueira Beret. Un trabalh compartit que permet compaginar era formacion esportiva damb un acompanhament academic, entà garantir un modèl formatiu duau centrat ena persona.

Aguesta setmana an començat es sessions de nhèu e trabalh fisic, mentre qu’es grops de gèu ja hè quauqui dies que comencèren es entrenaments, perque era sua activitat non depen des condicions dera nhèu. Es joeni esportistes trabalhen segontes eth programa annau elaborat peth sòn club de referéncia, damb seguiment constant entre tecnics e era equipa deth CETEI.

Nauetats importantes entara sason 2025/26

Un des grani auanci d’enguan ei eth servici de transpòrt entàs pistes, gràcies en part ara Bèca SpainSnow (https://www.conselharan.org/eth-cetei-val-daran-reconeishut-damb-ua-beca-dera-fondacion-spainsnow/) autrejada pera RFEDI ath projècte deth CETEI sus sostenibilitat e reduccion de desplaçaments. Aguest nau transpòrt collectiu permet:

• Redusir era peada de carbòni
• Fomentar era convivéncia e era coesion deth grop
• Garantir un accès segur e eficaç tàs pistes entàs entrenaments

Tanben s’a implementat ua importanta melhora en servici de minjador, gràcies ara collaboracion dera Escòla Garona, qu’a cedit espaci entà qu’es esportistes poguen auer eth minjar caud abans de tornar tara part academica dera tarde en INS d’Aran, a on se refortís era sua formacion curriculara damb sessions des diuèrses matèries.

Un programa qu’auance damb eth territòri

Eth Conselh Generau d’Aran vò remercar era foncion clau qu’a era Comission Tecnica deth Programa, composada peth personau deth CETEI e pes directors tecnics des clubs: CAEI, Copos Ski Club, AISC, MAC, Emotion, The Valley, CEVA e CEGVA. Era sua experiéncia e vision son fondamentaus entà definir estratègies, prioritats e besonhs deth programa e des esportistes.

Des dera direccion deth CETEI s’anime tant a esportistes com a tecnics a trabalhar damb constància, illusion e compromís, damb era esperança qu’aguesta sason pòrte grani resultats e progrèssi collectius entà toti es participants e entara Val d’Aran.

Eth Centre Especializat en Tecnificacion d’Espòrts d’Iuèrn-CETEI e toti es sòns agents son comprometudi damb eth desvolopament deth talent joen e damb era promocion des espòrts d’iuèrn com un des pilars identitaris dera nòsta Val.

Vielha, 12 de deseme  2025