Imatges : FOTOTUR

• Eth Conselh Generau d’Aran e era estacion d’esquí de Baqueira Beret organizen aguesta competicion, includida enes campionats d’Espanha de longa distància.

• Era competicion d’esquí de hons nacionau mès populara amassarà aguest dimenge, 1 de hereuèr, en Plan de Beret ath torn de 700 esquiaires aficionadi e professionaus, damb quate recorruts en tecnica classica de 42, 21 e 10 quilomètres, e era Mini Marxa Beret, de 5 quilomètres, dessenhadi entà toti es nivèus. Aguesta pròva harà part per dusau an consecutiu deth prestigiós circuit Ski Classics Challengers.

• Dissabte se correrà eth Trofèu Sprint Iberdrola, laguens dera Copa d’Espanha d’Esprint, qu’acuelherà as melhors especialistes deth país damb ua participacion d’uns 150 esquiaires.

Arribe en Plan de Beret, ena estacion d’esquí aranesa de Baqueira Beret, ua des dimenjades mès demorades deth panorama d’esquí de hons. Deth 31 de gèr ath 1 de hereuèr auràn lòc era 46au edicion dera Marxa Beret, que forme part des campionats d’Espanha de longa distància en tecnica classica, e eth Trofèu Sprint Iberdrola. Aguesta cita deth calendari, fòrça importanta a nivèu nacionau, arribe a amassar a mès de 700 esquiaires en aguest endret espectacular tà gaudir d’aguesta disciplina.

Era pròva ei organizada peth Conselh Generau d’Aran e Baqueira Beret, damb era collaboracion dera Reiau Federacion Espanhòla d’Espòrts d’Iuèrn (RFEDI), era Federacion Catalana d’Espòrts d’Iuèrn (FCEH) e es Ajuntaments de Naut Aran, Vielha e Mijaran, Pompièrs-Emergéncies, Volentaris d’Aran, ADDA, Salut e estudiants der Institut d’Aran. Aguest eveniment tornarà a convertir era Val d’Aran en punt de trobada entà esportistes, familhes e aficionadi ara nhèu.

Eth 31 de gèr se correrà eth tostemp apassionant Trofèu Sprint Iberdrola, a on se trobaràn es melhors especialistes de tot eth territòri damb er objectiu de somar punts entara Copa d’Espanha.

De un aute costat, eth dimenge 1 de hereuèr aurà lòc era 46au edicion dera Marxa Beret, que tanben ei campionat d’Espanha de longa distància. Es fòrtes nheuades previstes ath long de tota era setmana hèn qu’enguan non se pogue hèr era iconica baishada enquia Montgarri, enes distàncies de 21 e 42 quilomètres. Totun, era organizacion trabalhe de manèra intensa e damb un gran esfòrç entà abilitar un circuït que respècte aqueres distàncies.

Eth conselhèr d’Espòrts deth Conselh Generau, Javier Cavero, a afirmat que: “Aguesta 46au edicion assolide era Val d’Aran coma un referent en esquí de hons, non ei sonque ua competicion esportiva tanben ei ua hèsta dubèrta a totes es edats e nivèus, un eveniment que projècte eth nòste territòri, era nòsta cultura, e eth nòste compromís damb era practica esportiva e damb era natura”.

Marc Puig, director dera Marxa Beret a remercat que “enguan demoram que sigue ua edicion que pogam hèr realitat enes melhors condicions possibles. Damb es abondiues nheuades, mos a calut trabalhar de forma activa e constanta en circuit, perque ei mès complèxe de mercar e traçar. Concrètaments, operam damb era alternatiua deth circuit de 21 quilomètres, sense baishar entà Montgarri e damb es 4 distàncies plan definides: era mini Marxa Beret, de 5 quilomètres, e es tradicionaus recorruts de 10, 21 e 42 quilomètres. Demoram era preséncia d’esquiaires de Norvègia, Argentina, França o Andòrra, entre d’autes nacions, damb un 15% de participaires de dehòra deth panorama nacionau”.

Era gessuda dera Marxa Beret ei programada tàs 10.00 deth maitin e se desvoloparà jos era modalitat d’estil classic, coma ja ei abituau. Aguestes distàncies son adaptades as desparièrs nivèus des participaires: un traçat de 42 quilomètres reservat as esquiaires mès expèrts e qu’ath delà serà eth Campionat d’Espanha FIS de Longa Distància; un traçat de 21 quilomètres, pensat entà esquiaires de nivèu miei que cerquen un rèpte esportiu significatiu; e era de 10 quilomètres, tà toti es nivèus, includidi esquiaires que se volguen iniciar en esquí de hons en un entorn competitiu mès accessible e era mini Marxa Beret, de 5 quilomètres, entà víuer era experiéncia en familha. Eth liurament de prèmis se harà as 13.30 h, seguida dera ceremònia de clausura, que barrarà era dimenjada.

Encara son dubèrtes es inscripcions presenciaus, que se poiràn hèr ena Sala Polivalenta de Vielha eth diuendres 30 de gèr, de 16.00 a 20.00 h, e eth dissabte 31 de gèr, de 09.00 a 21.00 h.

Vielha, 29 de gèr 2026