- Damb aguesta iniciativa, eth Govèrn d’Aran vò promòir era creacion e adaptacion de cançons en aranés.
- Es inscripcions entad aguesta dusau edicion ja son dubèrtes e eth tèrme de presentacion des òbres se barrarà eth 20 d’abriu.
Eth Conselh Generau d’Aran anóncie era dusau edicion deth concors Aranvision 2026, un eveniment que vò impulsar era creacion e adaptacion musicau en aranés. Aguest concors a coma objectiu promòir er usatge dera lengua pròpria d’Aran ath torn dera musica, entà que sigue un espaci creatiu e de promocion der aranés.
Bases deth concors Aranvision 2026
Era participacion ei dubèrta a totes aqueres persones que complisquen damb es requisits establidi enes bases. Es participants se poiràn presentar coma solistes o coma membres d’un grop en dues categories:
- Categoria Joeni, entà persones d’entre 10 e 17 ans (tostemp que non agen hèt es 18 ans en moment de hèr era inscripcion). En aguest cas, cau presentar ua autorizacion escrita deth pair, mair o tutor legau.
- Categoria Adults, entà persones de 18 ans o mès.
Es inscrits poiràn optar a participar-i de manèra individuau o en grop. Aqueri que se presenten en grop poiràn formar part d’un grop d’enquia 6 persones, includidi cantaires, musics e dançaires.
Cada participant pòt concórrer enes dues subcategories: “Milhor cançon adaptada ar aranés” e “Milhor cançon inedita en aranés”.
Non se pòden presentar en cap de categoria es guanhadors/guanhadores dera edicion anteriora.
Com participar-i?
Entà participar, es interessats auràn de presentar era següenta documentacion a trauès dera plana web deth Conselh Generau d’Aran:
- Formulari d’inscripcion degudament completat e signat.
- Autorizacion escrita deth pair, mair o tutor legau, en cas des menors d’edat.
- Archiu de son en format MP3 dera cançon a presentar.
- Archiu de video en format MP4 dera actuacion prevista entara gala.
- Letra dera cançon en format de tèxte.
Eth tèrme de presentacion des òbres ei eth 20 d’abriu de 2026, tàs 12.00 deth meddia.
Eth Conselh Generau d’Aran organizarà era Gala Finau d’Aranvision 2026, que serà en dirècte, laguens des actes previsti pendent ena celebracion deth Hestau Terson.
Entà mès informacion e inscripcions, es interessadi pòden consultar es bases deth concors en:
Vielha, 20 de hereuèr 2026