• Eth cors a començat aguest maitin e se alongarà enquiath diuendres 23 d’octobre. Combine sessions formatives, visites sus eth terren e un practicum entà aprofundir ena istòria, era lengua e eth patrimòni culturau dera Val d’Aran.

Eth Musèu dera Val d’Aran, organize deth 19 ath 23 d’octobre de 2026 eth Cors de guides deth Patrimòni aranés, ua iniciativa formativa adreçada a aprohondir ena coneishença dera istòria, era lengua, es tradicions e eth patrimòni culturau dera Val d’Aran.

Eth cors compde damb era collaboracion d’Eteva e aufrís un totau de 40 ores de formacion, despartides en 30 ores presenciaus e 10 ores de practicum.

Era formacion s’impartís en aranés e catalan e ei a cargue de professionaus deth Conselh Generau d’Aran des airaus de Cultura, Musèus, Lengua e Nivologia, atau coma d’especialistes en istòria der art e arqueologia.

Eth programa combine visites sus eth terren, recorreguts culturaus e sessions interpretatives en diuèrsi pòbles dera Val d’Aran. Era prumèra jornada, en Vielha, ei dedicada ara identitat aranesa e includís visites ath Musèu dera Val d’Aran, ara Habrica dera Lan e ara glèisa de Sant Miquèu, ath delà d’ua session sus era situacion actuau dera lengua aranesa.

Eth dusau dia se centre ena evolucion istorica a trauès deth patrimòni religiós e arqueologic de Betren, Escunhau, Arties e Garòs. Er itinerari includís es glèises de Sant Estèue, Sant Pèir, Santa Maria d’Arties e Sant Julian, atau coma era anciana necròpoli de Garòs.

Era jornada dedicada ath terçon de Lairissa permet conéisher es activitats economiques tradicionaus de montanha. Eth recorregut comence en Vilamòs e includís era Bassa d’Arres, era Mina Victòria, eth sòn centre d’interpretacion e era galaria Sacòsta, ath delà der Ecomusèu Çò de Joanchiquet e dera glèisa de Santa Maria de Vilamòs. En cas de mau temps, era visita ara mina se substituirà pera visita ath Musèu dera Nhèu.

En Pujòlo, es participants descorbiràn eth patrimòni de Sant Andrèu de Salardú, era Mòla de Salardú, Santa Maria de Cap d’Aran, en Tredòs, e Santa Eulària d’Unha.

Eth cors acabarà en Quate Lòcs damb visites ara glèisa dera Màir de Diu dera Purificacion de Bossòst, ara plaça deth Haro de Les, ath Castèth e ath Musèu des Hèstes deth Huec, damb er objectiu d’apregondir ena coneishement deth patrimòni e des tradicions dera Val d’Aran.

Era formacion includís un practicum de dètz ores entà preparar era pròva finau. Aguesta consistirà en ua presentacion orau, de 30 menutes coma maxim, sus un des elements patrimoniaus visitats, en tot simular ua visita guidada adreçada a toristes. Ena avaloracion se tieràn en compde era qualitat e era veracitat des contenguts, er usatge dera lengua, es recorsi oraus e era capacitat de connectar damb eth public.

Es persones qu’acrediten un minim deth 80 % d’assisténcia receberàn un certificat d’assisténcia de 30 ores. Ath delà, es que superen eth practicum obtieràn un certificat d’aprofitament de 40 ores.

Damb aguesta iniciativa, eth Conselh Generau d’Aran e eth Musèu dera Val d’Aran refortilhen era formacion de persones interessades en interpretar, meter en valor e difóner eth ric patrimòni istoric, culturau e naturau deth territòri aranés.

Vielha, 19 d’octobre de 2026