• Eth programa d’Espòrt Blanc Escolar s’a tornat a desvolopar aguesta sason ena Val d’Aran damb ua fòrça bona participacion des escolans e escolanes de 3au e 4au de primària, en tot consolidar-se coma ua iniciativa clau entà apropar es espòrts de nhèu as mès joeni e fomentar abituds de vida saludables en contacte damb era montanha.

Aguest programa —impulsat pera Generalitat de Catalunya— permet cada an qu’ath torn de 2.000 alumnes deth Pirenèu practiquen espòrts de nhèu laguens der orari escolar, en tot facilitar era iniciacion en disciplines pròpries dera nhèu e era montanha (esquí aupin, esquí de hons e snowboard) e en tot hèr possible qu’es mainatges e mainades coneishen e valoren eth sòn entorn naturau.

En territòri aranés, eth programa ei gestionat peth Conselh Esportiu dera Val d’Aran damb eth supòrt deth Conselh Generau d’Aran. Es dues institucions an er objectiu de promòir conjuntament er espòrt popular, er espòrt de base e er espòrt escolar, en tot reforçar era cultura esportiva vinculada ara montanha.

Aguesta edicion a compdat damb era participacion des centres educatius ZER Val d’Aran, Escola Garona, Escòla Sant Ròc e Escòla Alejandro Casona. Es escolans e escolanes an participat en un conjunt de jornades formatives a on an pogut iniciar-se en diferents espòrts de nhèu, en tot combinar aprenedissatge tecnic damb coneishement deth miei naturau e des valors associades ara practica esportiva en montanha.

Eth programa, adreçat ara mainadèra de 8 a 10 ans, ei fòrça mès qu’ua introduccion ar espòrt: ei ua experiéncia educativa que fomente eth trabalh en equipa, era convivéncia e eth respècte en entorn naturau. A trauès d’aguesta iniciativa, fòrça mainatges e mainades deth Pirenèu an pogut descorbir era nhèu e es sues possibilitats esportives, en tot reforçar ath madeish temps era relacion damb eth territòri.

Eth passat deluns 16 de març, era estacion de Beret a acuelhut era jornada de clausura entàs escolans de 4au de primària, ua trobada fòrça especiau qu’a combinat espòrt, celebracion e convivéncia. Era jornada a compdat tanben damb era participacion des escòles dera Alta Ribagorça, e a estat un espaci d’intercambi e relacion entre mainatges de diferents territòris de montanha.

Aguestes trobades meten en valor era importància der afrairament entre comarques vesies que compartissen realitat, cultura e paisatge. Era cooperacion e era collaboracion entre territòris coma era Val d’Aran e era Alta Ribagorça ei clau entà impulsar projèctes educatius e esportius que genèren oportunitats entàs mainatges e mainades.

Des deth Conselh Esportiu dera Val d’Aran e deth Conselh Generau d’Aran se vò remarcar que programes coma er Espòrt Blanc Escolar son fondamentaus entà consolidar ua cultura esportiva de base, en tot facilitar qu’es naues generacions creishen damb ua relacion activa, sana e respectuosa damb era montanha.

Aguest programa represente, en definitiva, un projècte de futur entà seguir promoiguent er espòrt, era educacion e era cooperacion entre territòris de montanha, en tot hèr dera nhèu e dera natura un espaci d’aprendissatge compartit.

Er Espòrt Blanc Escolar ei, en definitiva, un projècte de futur: entà educar, entà coesionar e entà hèr a créisher eth sentiment de pertanhença ath territòri a trauès der espòrt e dera natura. Arregraïr ath collectiu de mèstres des escòles deth territòri que son part deth succès d’aguestes iniciatives.

Vielha, 20 de març 2026