Era passada setmana, eth Palai de Gèu de Vielha siguec eth scenari dera Jornada de Natacion organizada peth Conselh Esportiu dera Val d’Aran, damb eth supòrt deth Conselh Generau d’Aran e era collaboracion d’Aran Swim Team, en ua activitat que metec en valor quauquarren mès qu’era practica esportiva.

Era jornada, qu’ère includida ena Fasa Intercomarcau, ère fòrça importanta entara classificacion entath Campionat Nacionau de Catalunya, previst entàs dies 30 e 31 de mai en Igualada. Maugrat açò, er ambient viscut ena piscina deth Palai de Gèu evidencièc que, mès enlà des resultats, aquerò que vertadèrament destaquèc siguec er esperit de comunitat, er aprendissatge e era convivéncia.

En totau se trobèren ath torn de 80 participants, entre escolars e familhes, damb ua participacion includida de 13 adults que tanben se lancèren ena aigua entà dar exemple des valors que represente er espòrt. Ua imatge fòrça potenta que rebrembe qu’educar enes valors der espòrt ei, fòrça viatges, ua qüestion d’actitud e compromís collectiu.

Era preséncia e implicacion d’Aran Swim Team, club deth territòri que ja hè mès de ueit ans que desvolòpe era sua activitat, siguec clau entà dar continuitat ad aguesta jornada. Eth sòn trabalh ei fondamentau entara sociabilizacion a trauès der espòrt e, sustot, entà mantier era practica esportiva en edats posteriores ara primària, un moment critic a on era taxa d’abandon ei fòrça nauta e a on cau ua accion coordinada, tant des institucions com dera societat.

Dispausar d’installacions esportives de qualitat e adaptades ath territòri ei fondamentau. En un entorn com era Val d’Aran, garantir e mantier espacis com eth Palai de Gèu de Vielha ei clau entà assegurar era practica esportiva pendent tot er an, mès enlà dera sason d’iuèrn. E tanben n’ei eth besonh de trabalhar amassa entà definir un parc d’installacions esportives que dongue responsa as besonhs actuaus e futurs deth territòri, pensant en totes es edats, disciplines e nivèus.

En paraules deth conselhèr d’Espòrts, Javier Cavero: “Er espòrt ei ua airina fondamentau de coesion sociau e de desvolopament personau. Per açò, ei imprescindible auer ues installacions dignes e foncionaus, mès tanben ua vision compartida de futur que mos permete dessenhar, entre toti, un parc d’equipaments esportius ath servici des persones deth territòri”.

Eth Conselh Generau d’Aran vò remercar era importància d’aguestes iniciatives, que contribuïssen a hèr deth espòrt ua airina de salut, de coesion sociau e de desvolopament personau. Perque er espòrt ei fòrça mès que hèr activitat fisica: ei salut, ei comunitat, ei creishement, ei aprendissatge e ei futur.

Maugrat qu’entàs mès petiti es resultats son tostemp un element emocionant e motivador, era jornada deishèc clar qu’eth vertadèr succès ei participar, apréner e créisher amassa.

Vielha, 04 de mai de 2026