• Ei a trauès d’un projècte d’adequacion e melhora dera planta de tractament de residus damb er objectiu principau de guanhar espaci operatiu, seguretat e salubritat enes installacions. Aguesta intervencion respon ara volontat de modernizar es servicis e adaptar-les as besonhs actuaus deth territòri.

• Entre es accions previstes cau soslinhar era adequacion der extrem oèst dera planta, mesura que permeterà optimizar es espacis de trabalh e facilitar es maniòbres des veïculs.

Eth Conselh Generau d’Aran a prèst dejà eth projècte de melhora dera planta de tractament de residus plaçada ena carretèra deth Tunèl entà adequar aguest espaci as actuaus besonhs en encastre de tractament de residus atau coma actualizar-ne era operativitat.

Er extrem oèst dera planta s’adequarà entà perméter optimizar es espacis de trabalh e facilitar es maniòbres des veïculs. E, per un aute costat, ena plataforma inferiora, era ampliacion serà parciau enes zònes a on ei tecnicament viabla.

Eth projècte includís tanben era estabilizacion deth talús sud e se harà ua neteja e reperfilat deth terren, acompanhat dera installacion d’ua malha antierosiva e d’ua naua hilada de pèira entà reforçar era seguretat.

Ua auta actuacion clau ei era melhora dera zòna de recepcion dera FORM, a on se bastirà un cubèrt metallic entà evitar era entrada de ploja e nhèu, redusint atau eth pes des residus e era generacion de lixiviats. Tanben s’installarà un sistèma de drenatge e un depòsit sosterrat entà gestionar aguesti liquids de manèra controlada. Entà evitar acumulacions d’aigua, se crearà un drenatge transversau que canalizarà tant es aigües d’escolament coma es procedentes dera activitat pròpria dera planta, milhorant atau era seguretat e era igièna der entorn.

Eth projècte contemple per prumèr còp ua zòna especifica entà lauar es camions, damb un depòsit estanc entà recuélher es aigües utilizades e garantir-ne eth tractament corrècte. Aguesta installacion contribuirà a ua melhora des condicions sanitàries e operatives. Ath madeish temps, se crearà un depòsit d’aigua de servici laguens dera Nau 3, associat a un grop de pression, entà assegurar eth foncionament continu des servicis e evitar problèmes derivats des gelades.

Finaument, eth projècte includís era substitucion des pòrtes des naus 1 e 2, fòrça deteriorades, per d’autes de naua generacion que facilitaràn es operacions diàries e aumentaràn era seguretat.

Eth conselhèr de Gestion Ambientau, Transicion Energetica e Innovacion, Oriol Sala, a soslinhat que “aguesta actuacion ei clau entà adaptar era planta as exigéncies actuaus e futures, en tot garantir un servici mès eficient e segur entara ciutadanetat”.

Sala a hijut que “eth projècte mos permeterà milhorar era gestion des residus en Aran, damb un impacte positiu tant en miei ambient coma ena qualitat deth trabalh des operaris”.

Damb aguest conjunt de mesures, eth govèrn d’Aran reafirme eth sòn compromís damb era sostenibilitat, era innovacion e era milhora continua des infrastructures publiques dera Val d’Aran.

Vielha, 06 de Mai de 2026