• Era iniciativa facilitarà era incorporacion der aranés en establiments comerciaus e d’ostalaria a trauès de vinils damb vocabulari especific de cada sector.

• Es negòcis aderidi auràn promocion enes canaus de comunicacion oficiaus.

Eth Conselh Generau d’Aran, a trauès deth Departament de Lengua, met en marcha era campanha «ACÍ NE DIDEM», ua iniciativa destinada a fomentar era preséncia e er usatge dera lengua aranesa en establiments comerciaus, de restauracion dera Val d’Aran.

Era campanha consistís ena distribucion de vinils electroestatics damb paaraules e frases relacionades damb cada activitat economica, entà facilitar era visibilitat der aranés enes espacis d’atencion ath public. Es materiaus, facils de plaçar e retirar, les distribuïrà ua persona acreditada peth Conselh Generau d’Aran.

Entà adaptar-se as diferenti sectors s’an creat sies linhes diferenciades per colors: restaurants, lotjaments, comèrç de ròba, comèrç d’espòrt, alimentacion e libreries.

Era campanha, que comence aguest mes de junhsèga, se mantierà activa enquiath mes de deseme de 2026.

Entà participar-i es establiments auràn de signar eth document d’adesion ara campanha e eth consentiment que permete ath Conselh Generau d’Aran utilizar eth logotip, era marca o era imatge der establiment ena difusion dera iniciativa a trauès dera plana web e des hilats sociaus institucionaus.

Es establiments aderidi auràn visibilitat enes canaus de comunicacion deth Conselh Generau d’Aran, hèt que contribuirà a difóner a reforçar era sua imatge de proximitat e identificacion damb eth territòri eth sòn compromís damb era lengua aranesa.

Rebrembar que, parallèlament, eth Conselh Generau met ara disposicion des establiments un servici gratuït de traduccion de cartes e menús de restaurants, atau coma de retolacion e d’auti contenguts comerciaus en aranés, damb era volontat de facilitar era incorporacion dera lengua pròpia dera Val d’Aran ena activitat quotidiana des negòcis que pòden sollicitar per corrèu electronic a lengua@aran.org.

Eth Conselh Generau d’Aran compde damb era collaboracion deth Grèmi d’Ostalaria dera Val d’Aran e de Foment Torisme Val d’Aran entà hèr arribar era campanha as sòns associadi e encoratjar era sua participacion. Es dues entitats an enviat un comunicat as sòcis informant-les dera iniciativa e des passi de besonh entà formalizar era adesion.

Damb «ACÍ NE DIDEM», eth Govèrn aranés refortís eth sòn compromís damb era promocion e normalizacion dera lengua aranesa, en tot impulsar era sua preséncia ena vida diària e enes establiments que formen part deth teishut economic dera Val d’Aran, en tot implicar ath sector comerciau e toristic coma aliat fondamentau ena preservacion e difusion dera lengua pròpia d’Aran.

Vielha, 29 de junhsèga de 2026