Era intervencion a permetut milhorar er estat de conservacion des dues campanes e garantir-ne eth foncionament corrècte.

Eth Conselh Generau d’Aran a hèt ua intervencion de conservacion e reparacion des campanes dera glèisa de Sant Pèir de Gessa, entà garantir-ne era integritat, eth corrècte foncionament e era conservacion deth conjunt dera estructura d’ancratge.

Era intervencion a consistit ena substitucion des joates des dues campanes, entà respectar era tipologia e era foncionalitat des elements anteriors, damb husta naturau e tractada sense vernisi sintetics. Tanben s’a hèt era consolidacion, adequacion e reparacion de tota era estructura d’ancratge, damb es joates naues e es batalhs, e s’an installat es campanes en sòn lòc originau.

Eth prètz finau deth contracte a estat de 15.714,27 euros, IVA includit. Es trabalhs an durat tres mesi, an estat supervisadi peth personau tecnic der Airau de Patrimòni deth Conselh Generau d’Aran e s’a compdat damb era collaboracion dera EMD de Gessa entara retirada e reposicion des dues pèces.

Aguesta intervencion a permetut recuperar e preservar es campanes dera glèisa de Sant Pèir de Gessa, un element deth patrimòni arquitectonic e culturau d’Aran, d’origina romanica ―encara qu’eth campanau date deth sègle XVII―, entà garantir-ne era conservacion e eth sòn corrècte foncionament entath futur.

Eth Conselh Generau d’Aran seguís d’aguesta manèra damb eth sòn compromís de conservar e mantier eth patrimòni aranés, tà revalorizar es elements d’interès istoric e culturau deth territòri.

Vielha, 12 d’Agost de 2026