• Eth Conselh Generau d’Aran a acabat es trabalhs de recuperacion deth camin dera Trauèssa, un itinerari circular que connècte diuèrsi punts d’interès dera zòna de Sant Joan de Toran e eth baish Aran.

Era intervencion, damb ua inversion de lèu 9.000 euros, a consistit ena recuperacion deth traçat e er apariament dera plataforma deth camin, atau com dera melhora dera senhalizacion der itinerari.

En çò que hè ara senhalizacion, es tres pannèus direccionaus ja son plaçats, e era setmana que ven se completarà era senhalizacion orizontau damb es corresponentes mèrques auriòles.

Er itinerari ei circular, a ua longada de 10,6 quilomètres e un desnivèu acumulat d’uns 800 mètres, e se pòt completar en 4 o 5 ores, en foncion deth ritme. Eth camin se pòt hèr enes dus sentits.

Gessent deth refugi dera Honeria, eth recorrut passe per Sant Joan de Toran, era cabana dera Trauèssa, era cabana de Plan e eth Plan de Grauèrs, entà tornar a baishar tath refugi pera zòna deth barratge de Sant Joan de Toran.

Aguesta intervencion permet recuperar e méter en valor un itinerari de montanha d’interès entà descorbir eth patrimòni naturau e paisatgistic de Sant Joan de Toran, e ath madeish temps facilite era orientacion e seguretat des persones que hèn eth recorrut.

Eth Conselh Generau d’Aran trabalhe ena recuperacion, conservacion e senhalizacion deth hilat de camins dera Val d’Aran, damb er objectiu de garantir-ne eth bon estat e facilitar qu’era ciutadanetat e es visitaires i poguen transitar.

Vielha, 25 d’agost de 2026