Entre es dies 23 e 30 de seteme se celèbre en toti es païsi dera Union Europèa era Setmana Europèa der Espòrt (#BeActive), ua iniciativa dera Comission Europèa que nèish damb er objectiu de promòir era activitat fisica, es abituts de vida sanes e era importància d’incorporar eth moviment e er espòrt ena vida vidanta.

Eth Conselh Generau d’Aran, a trauès deth Departament d’Espòrts, se some un an mès ad aguesta iniciativa e vò convidar ath teishut associatiu, educatiu e esportiu dera Val d’Aran a participar-i activament e a dar visibilitat ath messatge dera campanha.

Clubs e entitats esportives, Conselh Esportiu, centres educatius, centres esportius, federacions, administracions, empreses, esportistes e ciutadanetat son agents clau entà hèr a créisher ua cultura esportiva e ua vida mès activa en territòri.

Enguan, jos eth lèma #BeActive, volem anar un pas mès enlà: non cau èster esportista entà hèr espòrt. Cau botjar-se, participar e hèr dera activitat fisica ua part dera nòsta vida.

Per aquerò, des deth Departament d’Espòrts animam as entitats e agents deth territòri a organizar activitats, sessions, iniciatives o accions de sensibilizacion ath long dera setmana e a compartir-les enes sòns hilats sociaus damb es etiquetes #BeActive e #esportcat.

Cada activitat compde. Cada persona que se botge, tanben.

Era Setmana Europèa der Espòrt ei ua oportunitat entà hèr visibles era fòrça e era diversitat deth nòste teishut esportiu e, ath madeish temps, entà seguir bastint ua Val d’Aran mès activa, sana e comprometuda damb er espòrt coma airina de benèster, educacion e coesion sociau.

Entà ampliar era informacion, descargar es recorsi visuaus, consultar es instruccions de participacion e visibilitat o registrar es activitats, consultatz era plana dera Setmana Europea de l’Esport 2026. Esport .

Vielha, 15 de seteme de 2026