Finalizen es trabalhs de melhora de tres camins dera Val d’Aran entà garantir-ne era seguretat e accessibilitat

Eth Conselh Generau d’Aran a amiat a tèrme actuacions de melhora enes accèssi a Es Bòrdes, Vielha pera Ribèra e Arròs des dera carretèra de Varradòs.
Es intervencions, damb ua inversion totau de 281.022,50 èuros, an coma objectiu melhorar era seguretat e facilitar era mobilitat des vesins e vesies.

Eth Conselh Generau d’Aran a finalizat pendent er an 2026 es trabalhs de melhora e manteniment de tres camins dera Val d’Aran, damb er objectiu de garantir-ne eth bon estat, melhorar era seguretat e facilitar er accès as nuclèus de poblacion.

Es actuacions s’an realizat en camin d’accès a Es Bòrdes, en un tram de 516,26 mètres que balhe servici ath nuclèu e as edificacions dispersades deth sòn entorn; en camin d’accès a Vielha pera Ribèra, en un tram de 451,18 mètres, ua via estrategica coma accès alternatiu e d’emergéncia ara capitau aranesa e entà accedir as installacions de subministrament d’aigua; e en camin d’accès a Arròs des dera carretèra de Varradòs, en un tram de 410 mètres, a on s’a intervengut entà melhorar er estat deth paviment deteriorat peth desgast e es condicions meteorologiques.

Eth conselhèr d’Infraestructures deth Conselh Generau d’Aran, José Luis Boya, a destacat que «eth manteniment deth hilat de camins ei fondamentau entà garantir era seguretat e era mobilitat en nòste territòri. Damb aguestes actuacions melhoram es condicions d’accès as pòbles e reforçam era funcionalitat d’aguestes vies, tant entath dia a dia des vesins e vesies coma entà possibles situacions d’emergéncia».

Era inversion totau des tres intervencions a estat de 281.022,50 èuros e s’emmarque en programa de melhora e manteniment de camins dera Val d’Aran, impulsat peth Conselh Generau d’Aran damb eth supòrt dera Generalitat de Catalunya, a trauès deth Departament de Territòri, Abitatge e Transicion Ecologica.