• Aran amassarà expèrts internacionaus, institucions audiovisuaus europèes e referents ena intelligéncia artificiau entà parlar deth futur des lengües minoritàries.

Eth Conselh Generau d’Aran organize, amassa damb RTVE, era Universitat Pompeu Fabra e era Universitat de Lleida, era dusau edicion deth Congrès Internacionau sus Comunicacion, Tecnologia e Lengües Minoritàries, ua trobada que convertirà Aran en principau espaci europèu de reflexion sus es rèptes e oportunitats qu’an es lengües minoritàries deuant dera transformacion digitau e era irrupcion dera intelligéncia artificiau.

Damb eth lèma «Eth futur des lengües minoritàries a trauès dera comunicacion», eth congrès se celebrarà es dies 26 e 27 de noveme en Era Audiovisuau, e amassarà representants de mejans de comunicacion publics, investigadors, universitats, empreses tecnologiques e institucions lingüistiques provenentes de tota Euròpa.

Damb aguesta iniciativa, eth Conselh Generau d’Aran reafirme eth sòn compromís damb era promocion e era projeccion der aranés, e place era realitat lingüistica aranesa enes principaus debats internacionaus sus innovacion, comunicacion e diversitat culturau. Eth congrès contribuís tanben a consolidar Aran coma un territòri de referéncia en impuls de projèctes vinculadi as tecnologies lingüistiques e ara preservacion des lengües minoritàries.

Eth programa includís era participacion de representants d’organizacions de referéncia com era European Broadcasting Union (EBU), Public Media Alliance, RTVE, EITB, 3Cat, RTVA, Swedish Radio, BBC ALBA e France 3 Corse ViaStella, atau coma expèrts de Microsoft, ElevenLabs e deth Barcelona Supercomputing Center.

Es sessions tractaràn qüestions clau com era creacion de contenguts digitaus en lengües minoritàries, era foncion des mejans de comunicacion ena normalizacion lingüistica, es naui modèls audiovisuaus europèus e es oportunitats qu’aufrís era intelligéncia artificiau entà sauvar era preséncia, era competitivitat e era vitalitat des lengües damb mens recorsi enes entorns digitaus.

Er aranés, projèctes de futur

Ua part importanta deth congrès serà dedicada as tecnologies desvolopades entar aranés e er occitan. En aguest encastre, se presentaràn es auanci deth projècte LINGUATEC-IA, qu’impulse naues airines entà facilitar er usatge, era disponibilitat e era projeccion digitau des lengües minoritàries. Tanben se haràn a conéisher iniciatives restacades ara traduccion automatica, as còrpus lingüistics e as recorsi tecnologics destinadi as lengües de dimension redusida.

Eth congrès acuelherà tanben era presentacion dera naua Cadièra RTVE-UdL de Lengües Minoritàries, Comunicacion e IA, ua iniciativa destinada a fomentar era recèrca, era transferéncia de coneishement e era innovacion en aguesti sectors estrategics.

Aran, referent europèu en diversitat lingüistica

Entath Conselh Generau d’Aran, aguesta dusau edicion represente ua oportunitat entà continuar posicionant Aran coma un referent internacionau ena proteccion, promocion e modernizacion des lengües minoritàries, ath còp que da visibilitat as politiques publiques impulsades entà garantir eth futur der aranés enes naui entorns digitaus.

Era clausura compdarà damb era participacion dera sindica d’Aran, Maria Vergés, amassa damb representants institucionaus de RTVE e deth Govèrn der Estat.

Pendent dus dies, Aran serà er epicentre deth debat sus comunicacion, tecnologia e diversitat lingüistica, en tot reafirmar eth compromís deth Conselh Generau d’Aran damb eth futur der aranés e damb era construccion d’un ecosistèma digitau mès inclusiu entà totes es lengües minoritàries.

Vielha, 9 de noveme de 2026