Vielha, 6 de març de 2018.- Eth Conselh Generau d’Aran a trauès deth SIAH (Servici d’Informacion e Atencion ara Hemna) organize es actes de commemoracion deth Dia Internacionau des Hemnes, enguan damb er apondi dera Grèva feminista deth 8 de març de 2018 convocada en tota Espanha e impulsada pera Comission 8 de Març. Grèva laborau e estudiantil en favor dera igualtat de genre e contra era diferéncia salariau de genre e er endemic caumatge femenin.

Per aguest motiu se realizarà era lectura deth manifèst deth Dia Internacionau des Hemnes a cargue dera conselhèra de Torisme, Desvolopament Economic e Salut e Benéster d’Aran, Anna Díaz, eth dimèrcles dia 7 de març entàs 12 ores deth meddia ena Plaça deth Conselh Generau d’Aran, en tot auançar-se ara jornada de grèva deth dia següent.

Laguens des actes organizadi s’includís era celebracion dera 5au Còrsa dera Hemna 2018 organizada peth Servici d’Informacion e Atencion ara Hemna (SIAH) deth Conselh Generau d’Aran en collaboracion damb eth Conselh Esportiu dera Val d’Aran e era Associacion Volentaris Val d’Aran.

Era 5au Còrsa dera Hemna se celebrarà en Vielha eth pròplèu dimenge 11 de març de 2018.

Coma ja ei tradicionau era edicion dera Còrsa dera Hemna d’enguan se daràn tres prèmis pes següentes categories:

Absolutes hemnes; Juvenil; Sènior; Mastèr 30; Mastèr 40; Mastèr 50; Absoluts òmes.

Es inscripcions online ja se pòden formalizar a : https://www.inscripcions.cat/corsaderahemna2018/

Es inscripcions tanben se poderàn realizar presencialament eth diuendres 9 e dissabte 10 de març pera tarde de 17 a 20 ores ena plaça deth Conselh Generau d’Aran.

Eth prètz dera inscripcion ei de 3€.

Era recuelhuda de dorsaus se poderà realizar ena plaça deth Conselh Generau d’Aran, eth diuendres 9 e dissabte 10 de març pera tarde de 17 a 20 ores.

Era gessuda e arribada dera Còrsa serà ena plaça deth Conselh Generau d’Aran. Er orari dera gessuda dera 5au Còrsa dera Hemna serà entàs 11 ores deth dia 11 de març de 2018.