400 inscriti ena 6au Corsa dera Hemna Val d’Aran deth dimenge 10 de març
Vielha, 8 de març de 2019.- Eth Conselh Generau d’Aran a trauès deth SIAH (Servici d’Informacion e Atencion ara Hemna) organize es actes de commemoracion deth Dia Internacionau des Hemnes, enguan damb er apondi dera grèva feminista deth 8 de març. Grèva laborau e estudiantil en favor dera igualtat de genre e contra era diferéncia salariau de genre e er endemic caumatge femenin.
Per aguest motiu s’a realizat deuant era sedença deth Conselh Generau d’Aran er acte de lectura deth manifèst institucionau deth Dia Internacionau des Hemnes a cargue dera conselhèra Mª Angels Ordax, era conselhèra de Torisme, Desvolopament Economic e Salut e Benestar d’Aran, Anna Díaz, e eth vicesindic d’Aran, Cesar Ruiz Canela.
Laguens es actes organizadi peth Conselh Generau d’Aran s’a hèt tanben era presentacion deth vidèo “Èm Visiblas”.
Deman dissabte 9 de març en Palai d’Espòrts de Vielha as 17.00 ores se realizarà un Talhèr de circ e acrobàcies entara mainadèra. As 18.00 ores Chicolatada solidària entara investigacion deth càncer infantil en collaboracion damb era AMPA dera Escòla Garona, e as 18.30 ores espectacle “El somni de la Lluna” a cargue dera associacion de circ Ntlades.
Eth madeish dissabte pera tarde ena sedença deth Conselh Generau d’Aran de 17.00 a 20.00 ores inscripcions presenciaus e recuelhuda de dorsaus e samarretes entara 6au Corsa dera Hemna Val d’Aran que compde damb 400 inscriti.
Eth dimenge 10 de març ena plaça deth Conselh Generau d’Aran as 11.00 ores se darà era gessuda dera 6au Corsa dera Hemna Val d’Aran qu’enguan compde damb eth supòrt de granes esportistes coma es jogadores dera prumèra plantilha deth RCE Espanyol Femenin; era rider paralimpica medalha de bronze enes Jòcs Paralimpics de Pyeongchang 2018, Astrid Fina; Sandra Gómez, pilòt de Trial e Enduro Campiona deth Mon de Superenduro; era alpinista Edurne Pasaban, era prumèra hemna ena istòria en ascendir es 14 ueitmils; e es esquiaires d’esquí de hons araneses Marta Cester, Campiona d’Espanha d’esquí de hons skating e María e Lydia Iglesias. Ath delà tant Edurne Pasaban coma Lydia e Maria Iglesias participaràn ena 6au Corsa dera Hemna deth dimenge.
Era 6au Corsa dera Hemna ei daurida en toti e se daràn tres prèmis entàs següentes categories: Absolutes hemnes; juvenil; Senior; Mastèr 30; Mastèr 40; Mastèr 50; Absoluts òmes.
Era Corsa dera Hemna ei organizada peth Servici d’Informacion e Atencion as Hemnes (SIAH) deth Conselh Generau d’Aran en collaboracion damb eth Conselh Esportiu dera Val d’Aran e era Associacion Volentaris Val d’Aran laguens es actes organizadi a l’escasença deth Dia Internacionau des Hemnes.
