• Eth govèrn d’Aran, atau coma diferents associacions e institucions deth territòri, an organizat diferents activitats entà commemorar aguest 8 de març

Eth diuendres, 8 de març, se celèbre eth Dia Internacionau dera Hemna e era Val d’Aran acuelherà diferents actes commemoratius que se celebraran pendent tot eth mes de març, organizadi peth Conselh Generau d’Aran a trauès des sòns Servics Assistenciaus Integrats e Oficina de Joenessa, atau coma d’auti estaments e associacions deth territòri.

Eth madeish 8 de març entàs 12:00 ores aurà lòc era lectura deth manifèst, qu’enguan cèrque promòir eth messatge #HemnesEspòrteResisténcia, en tot commemorar era constància, era capacitat de superacion e era resisténcia fisica e mentau des hemnes en espòrt, en tot establir un parallelisme damb eth sòn papèr ena reivindicacion dera igualtat de genre.

Enguan, eth Conselh Generau d’Aran presente un nau modèl de Corsa damb era Xau Corsa Aran pes Hemnes de relhèus collaboratius, qu’aurà lòc eth 17 de març entàs 11:00  e que se presente coma un eveniment culturau, sociau e simbolic que da supòrt ara visibilitat e resisténcia des hemnes en nòste territòri, damb era intencion de fomentar ua corsa collaborativa e cooperativa.

Atau madeish, s’a organizat tanben un concors de cuertmetratges, en linha damb eth messatge #HemnesEspòrteResisténcia, s’amiaràn a tèrme diuèrsi talhèrs en collègis damb er objectiu d’abordar tèmes fondamentaus, com eth consentiment e era educacion afectiva-sexuau, e diferents Ajuntaments e associacions an organizat tanben charrades e eveniments per tot eth territòri.