• Eth Conselh Generau d’Aran, atau coma diferents associacions de hemnes e Ajuntaments deth territòri, an organizat diferents activitats entà commemorar aguest 8 de març

Eth dimars, 8 de març, se celèbre eth Dia Internacionau dera Hemna e era Val d’Aran acuelherà diferents actes commemoratius que se celebraran pendent tota era setmana.

Per part sua, eth Conselh Generau d’Aran a organizat entà dimars, 8 de març, era lectura deth manifèst peth Dia Internacionau dera Hemna e ua lectura der alumnat der Institut d’Aran de poèmes escrits per hemnes ena Plaça d’Aran de Vielha.

Eth dimèrcles, 9 de març, s’amiarà a tèrme eth collòqui entre hemnes dera Val d’Aran Viuences, passat, present e futur, qu’aurà lòc entàs 18:30 ores ena Bibliotèca de Vielha.

Diuendres, 11 de març entàs 19 ores, eth Musèu Etnologic dera Val d’Aran acuelherà era conferéncia Hemnes qu’inspiren. Es muses dera mitologia classica, a cargue de Mireia Rosich.

Fin finau, dimenge 20 de març entàs 11 ores, se reprenerà era celebracion dera tradicionau Corsa dera Hemna, que celebrarà enguan era sua 8au edicion, dempús de non auer-se podut celebrar er an passat pr’amor dera pandèmia.

Ath delà, es diuèrses associacions de hemnes deth territòri, atau coma er Ajuntament de Vielha an organizat tanben diuèrsi actes entà commemorar aguest 8 de març.