• Pendent toti es dies dera setmana, en orari de 10:15 e 11:15 ena Bassa d’Oles e entàs 15:30 en Plan Batalhèr, eth Conselh Generau d’Aran aufrís talhèrs d’educacion der entorn dirigits a tota era familha

• Entre es activitats que s’aufrissen i a talhèrs d’orientacion, gimcanes de rastres, formacions sus fauna e flora deth territòri, e jòcs de misteri entà resòler toti amassa! Es places son limitades e se pòt reservar en tot enviar un email a ambientau.aran@gmail.com

Eth Conselh Generau d’Aran aufrís aguest ostiu activitats d’educacion ambientau en orari de 10:15 e 11:15 ena Bassa d’Oles e entàs 15:30 en Plan Batalhèr de deluns a dimenge.

“Dempús des trabalhs de melhora e manteniment qu’amièrem a tèrme er ostiu passat, auem volut dinamizar aguesti espacis coma centres d’educacion der entorn, un projècte que respon ara idèa deth govèrn d’Aran d’apostar per un futur sostenible e responsable damb eth miei ambient, ath madeish viatge que fomentam era contractacion de persones joenes pendent era sason d’ostiu”, afirmaue eth conselhèr de Territòri, Paisatge e Gestion Ambientau, Francés Bruna.

Entre es activitats que s’aufrissen i a talhèrs d’orientacion, gimcanes de rastres, formacions sus fauna e flora deth territòri, e jòcs de misteri entà resòler toti amassa! Ath delà, ena Bassa d’Oles se pòt trapar ua exposicion permanenta sus es libellules e en Plan Batalhèr toti es dijaus entàs 17:00 ores i a conferéncies sus era natura e er entorn.

Es places son limitades e se pòt reservar en tot enviar un email a educa.ambientau.aran@gmail.com. Era aportacion economica ad aguestes activitats ei volontària.