Aguest dissabte, 18au edicion dera corsa Aranbike

  • I aurà diferents circuits adaptadi a cada participant: er Aranbike, de 45 km, eth Montromies, de 24 km, er infantil tà joeni d’enquia 15 ans e eth mini tà mainatges d’enquia 10 ans

  • Es inscripcions encara son dubèrtes enquias 24:00 ores d’aué, 22 d’agost

Eth pòble de Gessa acuelh aguest dissabte, 24 d’agost, era gessuda e arribada dera 18au corsa de BTT Aranbike. I aurà dus circuits adaptats ath nivèu de cada participant, un de 45 km e un aute de 24 km, ath delà s’aufrís un circuit infantil entà joeni d’enquia 15 ans e un aute mini entà mainatges e mainades d’enquia 10 ans.

Eth circuit Aranbike, de 45 km, ei circular e recor eth Naut Aran. Ua pròva destinada a ciclistes entrenats e apassionats dera BTT damb un desnivèu de 1800 m.

Eth circuit Montromies, de 24 km, ei recomanat entà toti aqueri participants que vòlen gaudir d’ua pròva que recor bona part deth Naut Aran mès sense era exigéncia fisica dera Aranbike. A un desnivèu de 1000 m.

Toti es interessats e interessades en participar en aguesta corsa son encara a temps de realizar era inscripcion online enquias 24:00 ores d’aué, 22 d’agost!

Es prètzi d’inscripcion son de 25 euròs tàs non federats, 20 euròs entàs federats ena Federació Catalana de Ciclisme (FCC) o era Real Federación Española de Ciclismo (RFEC), 10 euròs tàs participants deth circuit infantil e 5 euròs tath circuit mini.

Es dorsaus se poderàn remassar deman, diuendres 23 d’agost, de 17:00 a 20:00 ores en CAEI o eth madeish dissabte de 7:45 a 8:30 ores ena sala sociau de Gessa.

Era gessuda des circuits Aranbike e Montromies aurà lòc dissabte ena Plaça Major de Gessa tàs 9:30 ores, eth circuit infantil tàs 9:45 e eth es participants menors de 10 ans gesseràn tàs 10:00 ores. Era entrega de prèmis serà tàs 13:30.

Era corsa Aranbike ei organizada peth CAEI e compde damb era collaboracion deth Conselh Generau d’Aran, Foment Torisme Val d’Aran, er Ajuntament de Naut Aran, Haglöfs, Esierri, Briko, Baqueira-Beret e Galin Reiau.

Entà mès informacion sus recorregut, programa o normativa dera corsa, se pòt consultar era plana web deth CAEI.

Comments are closed.