• Eth tèrme entà presentar es sollicituds serà enquiath pròplèu dia 30 de mai de 2015 ena Oficina de Joenessa damb cita per auança, en orari d’atencion ath public.
Foto: Generalitat de Catalunya
Eth Conselh Generau d’Aran, mejançant era Oficina de Joenessa, darà supòrt ara convocatòria des ajudes entàs estudiants universitaris dera Val d’Aran.
Aguestes ajudes se concediràn entara mobilitat, aguesta mobilitat se compren coma desplaçament e lotjament dehòra deth territòri a on s’a era residéncia familhara. Ne pòden èster beneficiaris es estudiants que complisquen es requisits que seguissen:
Requisits generaus:
1. Auer era nacionalitat espanhòla o de bèth estat membre dera Union Europèa. En cas des estudiants estrangèrs non-comunitaris an d’acreditar era sua condicion de residents.
2. Demorar ena Val d’Aran coma minim des der 1 de gèr de 2012.
Requisits academics:
1. Èster matriculat en ua universitat catalana en cors 2014-2015, en uns estudis encaminats ara obtencion d’un títol oficiau de grad, de licenciatura, d’engenharia, d’arquitectura, de diplomatura o d’ensenhaments universitaris tecnics.
2. Èster matriculat en uns estudis que s’impartisquen de manèra presenciau.
3. Èster matriculat, en cors actuau de:
– Un minim de 60 crèdits ena matricula per cors complèrt en estudis de grad o 55 ena rèsta d’estudis.
– Un minim de 30 crèdits ena matricula semestrau en estudis de grad o 27,5 ena rèsta d’estudis.
4. Auer despassat eth 80% des crèdits matriculadi en cors anterior o deth darrèr cors corsat en ensenhaments non-tecnics (branques de coneishença d’arts e umanitats, sciéncies, sciéncies dera salut e sciéncies sociaus e juridiques) e eth 60%, en cas des ensenhaments tecnics (branques de coneishença d’engenharia e arquitectura), sonque en cas des persones sollicitantes que non inícien per prumèr còp estudis universitaris eth cors 2014-2015).
5. Demoren excludits d’aguesta convocatòria es persones qu’agen bèra titulacion universitària superiora e es persones qu’agen era independéncia familhara e economica dera sua unitat familhara.
Requisits economics:
Cau non depassar es limits de renda familhara disponibla e de patrimòni establidi.
Er impòrt maximal entà cada ajuda serà de 2.000 èuros.
Sollicituds e documentacion:
Era sollicitud s’a de completar mejançant eth formulari accessible via internet a trauèrs dera sedença electronica dera Generalitat de Catalonha.
Era documentacion a adjunhar:
• Fotocòpia deth document nacionau d’identitat deth/dera sollicitant e de toti es membres computables dera unitat familiar majors de 14 ans.
• Numèro deth compde bancari dera persona sollicitant.
• Certificat municipau de convivéncia a on cònste era data d’alta deth padron dera persona sollicitant en un municipi deth territòri, aumens des der 1 de gèr de 2012. En cas qu’es persones s’agen empadronat posterioraments ath 1 de gèr de 2012, ath delà deth certificat de convivéncia a on cònste era data d’alta deth padron municipau de tota era unitat familhau, cau presentar era documentacion acreditatiua deth centre d’ensenhament a on era persona sollicitant a estudiat eth cors 2012-2013 e/o quinsevolha auta documentacion que sigue acreditatiua d’aguesta circonstància.
• Fotocòpia der imprès dera matricula universitària corresponenta ath cors 2014-2015 damb era acreditacion que s’a hèt efectiu eth pagament. Se s’a optat per matricula semestrau, cau presentar era des dus semèstres.
• Fotocòpia der imprès dera matricula universitària corresponenta ath cors 2013-2014. Se s’a optat per matricula semestrau, cau presentar era des dus semestres (sonque en cas des persones sollicitantes que non inícien per prumèr còp estudis universitaris eth cors 2014-2015).
• Certificacion academica complèta, a on cònsten es assignatures e era convocatòria en qué s’an obtengut, en el cas des persones sollicitants que non corsen peth prumèr còp estudis universitaris. En aguesta certificacion tanben a de constar, de manèra clara, eth totau de crèdits matriculadi e eth totau de credits aprovadi eneth cors academic 2013-2014.
• En el cas des persones sollicitants que corsen peth prumèr còp estudis universitaris nòta PAU.
• Enes casi qu’eth estudiant non s’age matriculat dera quantitat de credits exigidi pera convocatòria, li cau justificar que s’a matriculat deth nombre maximum de credits d’acòrd damb era organizacion administrativa deth centre o peth motiu de finalizar es estudis.
Entà que cap de joen dera Val d’Aran se quede sense poder participar en aguesta convocatòria, era Oficina de Joenessa deth Conselh Generau d’Aran facilitarà era tramitacion dera documentacion d’aguesta linha d’ajut.
Entà sollicitar aguest ajut se pòden adreçar tara Oficina de Joenessa damb cita per auança, plaçada en Carrer Major 36, en orari d’atencion ath public: de deluns a diuendres de 10:00 a 14:00 ores. Damb cita prèvia damb Estefanía Revilla. Tel: 973642560
Eth tèrme entà presentar es sollicituds serà enquiath pròplèu dia 30 de mai de 2015.