Aprobacion deth padron de crubament dera taxa deth servici de recuelhuda de lordères

Vielha, 15 de gèr de 2018.- Eth plen deth Conselh Generau d’Aran en session extraordinària a aprovat eth padron de crubament dera taxa deth servici de recuelhuda de residus entad an 2018, damb un leugèr increment des ingrèssi der an anterior, er impòrt previst de recaptacion entad aguest exercici ei de 1.516.964,70 €.

Eth síndic d’Aran, Carlos Barrera, en referéncia ara situacion viscuda ena Val d’Aran en çò que tanh ath servici de recuelhuda de lordèra eth passat Nadau, informèc qu’en darrèr Conselh de Govèrn s’acordèc daurir un expedient informatiu ara enterpresa concesionària deth servici, entà qu’elabòre un informe motivat sus es arrasons qu’aguest Nadau era qualitat deth servici de recuelhuda a estat absoludaments negatiu.

Carlos Barrera, a ahijut qu’aguest expedient informatiu daurit ara enterpresa concessionària pòt aportar un replantejament der actuau modèl dera recuelhuda que sense dobte li calerà passar per ua major implicacion des ajuntaments, ua collaboracion mès suenhada per part des usatgèrs particulars e tanben per ua major rigor ena separacion des diuèrses fraccions e eth bon emplec des contienedors corresponents, qu’a bon segur melhorarà era imatge exteriora des punts de recuelhuda.

Era realitat que viu Aran ei qu’istoricaments enes hèstes de Nadau era poblacion se quadruplique en tot passar de 10.000 a 40.000 persones. Aguest hèt que non ei nau, non justifique era situacion viscuda aguest Nadau, ath delà de petites incidéncies coma son es veïculs mau parcadi qu’empedissen er accès des camions a quauqui punts de recuelhuda, e era concentracion en isles de contienedors de diuèrses fraccions a comportat era eliminacion per part des ajuntaments d’auti punts de recuelhuda, qu’an produsit un collapse de foncionament deth servici.

Tanben s’a d’auer en compde que toti es residus dera Val d’Aran se gestionen mejançant era transferéncia a diuèrsi tarcumèrs en tot depéner de cada fraccion, toti eri dehòra deth territòri e a ua distància minima de 100 km. Eth creishement dera gestion de quauques fraccions a comportat triplar eth nombre de viatges de transferéncia en relacion ath darrèr an. Aguest ei tanben un element que dificulte era eficiéncia deth servici.

Eth sindic d’Aran a remercat qu’eth pròplèu dijaus 18 de gèr s’a convocat era reünion deth Conselh Consultiu de Bailes dera Val d’Aran, a on entre d’auti punts se tractarà eth besonh d’ua major implicacion e collaboracion per part des ajuntaments, e un des aspèctes que s’abordarà serà demanar eth compromís des ajuntaments entà fixar naui punts d’ubicacion d’isles de contienedors, e ua melhor distribucion des zònes de contienedors, qu’aguest Nadau s’an demostrat absoludaments insufisenti.

En çò que tanh as ordenances, Carlos Barrera, didec qu’a arribat eth moment de hèr complir era nòrma, per çò qu’en aguesti prumèrs mesi der an se començarà ua campanha informativa de sensibilizacion, entà cercar era complicitat de toti es usatgèrs dera Val d’Aran, sus es oraris de recuelhuda de residus e era utilizacion deth servici.

Comments are closed.