• Aguest projècte cerque non sonque era adequacion deth refugi, senon tanben era potenciacion der entorn dera Val de Toran

Eth Conselh Generau d’Aran a aprovat eth procés de licitacion des òbres d’adequacion deth Refugi dera Honeria. Un projècte damb ua inversion de mès de 450.000 euròs que compòrte era reforma der actuau refugi, mès que non sonque cerque milhorar aguesta infraestructura, senon tanben es rutes de senderisme dera Val de Toran, en tot potenciar eth desvolopament toristic responsable, sostenible e de qualitat.

Aguesta propòsta de melhora a eth clar objectiu de desvolopar e profitar ath maxim eth gran auviatge naturau dera Val de Toran, en tot potenciar er atractiu toristic deth Baish Aran.

Es actuacions previstes en hilat de camins damb eth condicionament de naui trams harà qu’era aufèrta toristica d’aguest paratge sigue mès atractiva e variada entàs usatgèrs, mentre que, en çò que tanh ath refugi, non se cercarà era sua ampliacion, senon eth sòn renauiment e adequacion, de forma qu’eth nombre de places se mantierà mès se realizaràn ua serie de melhores, pr’amor qu’era installacion ei obsoleta dempús de vint ans aufrint servici.

Aguestes actuacions, que se poderàn desvolopar gràcies ara subvencion des Plans de foment territoriau deth torisme dera Direccion Generau de Torisme dera Generalitat, auràn de perméter condicionar era Val de Toran e era sua accesibilitat, ath madeish temps que se presèrve eth auviatge naturau e culturau que represente.