• Aguest maitin, eth Plen deth Conselh Generau d’Aran a aprovat, damb es vòts a favor d’UA e era abstencion de CA, eth plec entara licitacion deth contracte deth nau servici de gestion integrau dera remassada e evacuacion de residus. Un nau modèl que compaginarà era remassada pòrta a pòrta damb es ièrles barrades as que se poderà accedir damb era identificacion des usatgèrs e usatgères

• En aguest plen s’a dat compde dera renóncia ath cargue deth conselhèr generau d’Aran, per terçon de Quate Lòcs, Amador Marqués

Eth Plen deth Conselh Generau d’Aran a aprovat aguest maitin, damb era abstencion de CA e es vòts a favor d’UA, eth plec de clausules administratives e tecniques dera licitacion entath contracte deth nau servici de gestion integrau dera remassada e evacuacion de residus dera Val d’Aran.

“Deth govèrn d’Aran auem trabalhat pendent dus ans en dessenh d’aguest nau modèl de gestion de residus, en un procès en quau auem compdat damb era participacion dera ciutadania e a on s’a realizat un trabalh tecnic important entà adoptar un servici dimensionat ara generacion de residus actuau e qu’age en compde era realitat deth territòri” asseguraue eth conselhèr de Gestion Ambientau e Transicion Energetica, Oriol Sala, en tot híger que: “damb aguest nau modèl, cercam arténher ua optimizacion dera remassada de lordères en territòri, en tot garantir ua adequada separacion des fraccions entà minimizar er impacte ambientau que generam e obtier tanben ua maxima eficiéncia economica”.

Aguest nau modèl compaginarà era remassada pòrta a pòrta damb es ièrles barrades as que se poderà accedir damb era identificacion des usatgèrs e s’anarà implementant de forma progressiva un còp licitat e adjudicat eth servici.

Atau madeish, era sindica d’Aran, Maria Vergés, apuntaue que: “aguest modèl mos servirà entà arténher ua remassada de residus foncionau, que melhore era imatge deth nòste territòri e, sustot, que mos ajude a melhorar es donades de generacion de residus, entà auançar a un futur mès verd e sostenible en tot dar compliment as normatives e objectius que mèrquen era UE e era Agéncia Catalana de Residus”.

En aguest plen s’a amiat a tèrme tanben era presa de coneishement dera renóncia ath cargue deth conselhèr generau d’Aran, per terçon de Quate Lòcs, Amador Marqués Atés peth partit d’Unitat d’Aran.

En aguest sens, era sindica d’Aran a volut: “arregraïr era sua dedicacion e entrèga pendent aguesti darrèri ans, e era sua fèrma volontat per trabalhar tostemp a favor deth territòri e dera sua gent” e a destacat tanben: “era importància qu’a entath desvolopament territoriau e sociau dera Val d’Aran poder compdar damb representacion en Estat, en aguest cas, en tot compdar damb eth prumèr deputat aranés en Congrès”.