• Pendent es dies 23 de deseme e 7 de gèr, s’a artenhut ua aucupacion d’un 84,7%, ua chifra superior ara des ans anteriors, que sigueren deth 77% e eth 78%, respectivament

Era Val d’Aran a barrat enguan es hèstes de Nadau damb ues donades d’aucupacion fòrça positives: pendent es dies 23 de deseme e 7 de gèr, s’artenhec un 84,7% segontes es donades de Foment Torisme Val d’Aran, ues donades superiors as der an passat (77%) e er anterior (78%).

“Aguest periòde de vacances a auut ues chifres fòrça bones, arribant a superar es donades d’ans anteriors, quauquarren qu’ei ua noticia fòrça bona pr’amor que repercutís positivament en comèrç, era restauracion e era ostalaria deth nòste territòri” afirmaue eth vicesindic e conselhèr de Governacion, Innovacion, Economia e Torisme, Amador Marqués, en tot híger que “aguestes donades mos animen a continuar trabalhant entà hèr dera Val d’Aran un territòri melhor, e eth nòste objectiu principau ei arténher ua melhora substanciau ena sostenibilitat toristica d’Aran”.

Es donades d’aucupacion des darrèri dies de 2023 (pendent es dies 23-31 de deseme) an estat deth 91,6%, mentre qu’era prumèra setmana de 2024 (der 1 ath 7 de gèr) auem artenhut un 77,9%.

En aguest sens, eth conselhèr Marqués mostraue era sua satisfaccion per aguestes donades, en tot manifestar que “demòstren qu’eth nivèu dera nòsta aufèrta toristica ei d’ua nauta qualitat” e a volut arregraïr “eth trabalh amiat a tèrme per toti es estaments, publics e privadi, pendent aguestes dates de tant nauta afluéncia en nòste territòri”.

Er increment enes chifres d’aucupacion que venguem experimentant pendent es darrèri ans, son frut dera importanta labor de promocion realizada deth Departament de Torisme deth Conselh Generau d’Aran ençà, atau coma der esfòrç e dedicacion des establiments esportius, ostelèrs, de restauracion e comèrç deth territòri, que mos placen coma territòri referent en torisme de montanha.