• Dempús dera confirmacion de dus casi en Catalunya, Aran se dispause a méter en foncionament eth protocòl establit peth Departament de Salut dera Generalitat que definís era manèra de procedir per part deth personau sanitari deuant d’aguesti casi

Pendent aguest maitin, era vicesindica e conselhèra d’Igualtat, Salut e Benèster, Maria Vergés, a participat ena amassada de coordinacion des diuèrsi representants des airaus assistenciaus e de gestion d’Aran Salut e de Pompièrs Emergéncies entà coordinar era implementacion deth protocòl d’actuacion deuant deth nau coronavirus.

Aguest protocòl ei ellaborat pera Agéncia de Salut Publica de Catalunya (ASPC) a trauès dera subdireccion Generau de Vigilància e Respòsta a Emergéncies de Salut Publica, qu’ei qui a era competéncia en aguest tipe de ahèrs. Aguest procedement a seguir se base ena evidéncia scientifica, seguís es directritz dera Organizacion Mondiau dera Salut (OMS)- en coordinacion damb eth Ministèri de Sanitat e er Hilat de Vigilància Epidemiologica Europèa- e ei dubèrt a naues actualizacions a mesura que i age naues evidéncies sus aguesta malautia.

Atau madeish establís de forma clara eth circuït a seguir, que comence damb era notificacion per part d’un centre sanitari ar Hilat de Vigilància Epidemiologica de Catalunya dera existéncia o sospita d’un cas; e, en tot atier a un conjunt de critèris epidemiologics e clinics, Salut Publica (Generalitat de Catalunya) declare era alèrta o non. Es pròves efectuades en laboratòri de supòrt de vigilancia epidemiologica descartaran o confirmaran eth cas: s’ei positiu, se seguiran es mesures de prevencion e contròl, coma er isolament dera persona e eth seguiment des sòns contactes. En toti es casi, es servicis sanitaris li proporcionarien es indicacions de besonh.

“Per çò que hè ara Val d’Aran volem dar un messatge de tranquillitat ara poblacion pr’amor que non i a motius entà alarmar-se” declaraue era conselhèra Vergés e higie que “es nòsti professionaus sanitaris an tota era informacion ath respècte de coma procedir e eth contacte damb eth departament de salut dera Generalitat ei constant”.

Entà mès informacion podetz consultar era plana web dera Agéncia Catalana de Salut Publica: http://salutpublica.gencat.cat/ca/inici/