• Era sedença deth Conselh Generau d’Aran, en Vielha, acuelhie era presentacion oficiau dera XXau edicion dera Pedals de Foc Non Stop, que se harà eth dissabte 27 de junh.

Er acte compdaue damb era preséncia deth conselhèr d’Espòrts, Javier Cavero, eth baile de Vielha, Juan Antonio Serrano, eth referent deth ciclisme mondiau José Antonio Hermida; Rafa Lopez, director dera productora Zima Audiovisuales, e Pep Vega, director dera Pedals de Foc Non Stop.

Ath long dera presentacion, era organizacion mostraue eth sòn pregond arregraïment ath Conselh Generau d’Aran, ara Deputacion de Lhèida, as Ajuntaments de Vielha, Espot e era Torre de Capdella, e tanben a Baqueira Beret e ara rèsta d’empreses collaboradores qu’an hèt possible qu’aguesta mitica pròva artenhe es dus decennis de vida.

Recòrd d’inscrits e nauetats en recorrut

Aguesta vintau edicion consolide es sues dues distàncies classiques damb ua chifra recòrd de 1.200 participants: 1.000 ciclistes participaràn en modalitat Òr (211 km e 6.200 m de desnivèu positiu) e 200 ena modalitat Argent (83 km e 1.900 m d+). Era corsa compdarà damb ua grana representacion de totes es comunautats autonòmes der Estat espanhòu e damb corredors internacionaus arribadi de Portugal, França, Andòrra e Soïssa.

Eth traçat, que passe per quate comarques pirenenques, presentarà trams inedits de grana beresa. Ena modalitat Argent, cau remercar eth pas peth Pòrt deth refugi deth Pla de la Font, mentre qu’era modalitat Òr includirà un sector completament nau per laguens dera estacion d’esquí de Baqueira Beret, a on tanben i aurà eth darrèr avitalhament.

Vielha, 01 de junh de 2026