Era preséncia de Torisme Val d’Aran e Baqueira Beret en Ski Show de Londres e era dubertura dera oficina toristica en Toulouse eth darrèr mes d’octobre confirmen era tendéncia ar auce
Vielha 18 de hereuèr de 2016.- En tot mancar era confirmacion oficiau damb donades concrètes, que se haràn publics a fins d’aguest mes de hereuèr, se constate er increment de visitants anglesi e francesi ena Val d’Aran pendent aguesta sason d’iuèrn, en tot coïncidir ath delà d’aguesti dies dera punta dera sason nauta ena Val d’Aran, damb era celebracion des hèstes de carnaval en França, que hè que tradicionauments es toristes francesi mos visiten per aguestes dates.
Es motius dera aumentacion deth nombre de toristes anglesi ac trobam ena preséncia conjunta de Torisme Val d’Aran e Baqueira Beret en eveniments toristics de prumèr orde coma eth Ski Show de Londres, a on ath delà de promòir era ampla aufèrta d’esquí dera estacion de Baqueira Beret, se dèc a conéisher as operadors anglesi e as potenciaus clients dirèctes, tota era aufèrta toristica complementària atau coma era aufèrta culturau, gastronomica e otelèra dera Val d’Aran, entà atrèir mès toristes anglesi pendent tot er an .
Per d’auta part, era inauguracion eth darrèr mes d’octobre dera naua oficina toristica gestionada amassa per Torisme Val d’Aran e Baqueira Beret ena Rue du Pharaon nº 39, de Toulouse, a permetut coordinar es accions damb era oficina que hè ans a establida Baqueira Beret en Bordèus entà promòir e dinamizar pendent tot er an era Val d’Aran e qu’es toristes dera part sudoèst de França agen mès informacion e comencen a interessar-se tanben pes possibilitats que les aufrís era Val d’Aran dehòra dera sason d’iuèrn.
“Qu’i a un major nombre de toristes francesi e anglesi ena Val d’Aran, mos ac diden es empresaris toristics aranesi en nòste contacte jornalièr”, didec Anna Díaz, qu’a confirmat qu’es donades oficiaus se haràn publics a fins d’aguest mes de hereuèr, en tot coïncidir damb era presentacion oficiau as sòcis de Foment Torisme Val d’Aran, deth Plan Estrategic de Torisme Val d’Aran entath periòde 2016-2020”.
Era conselhèra de Torisme e Desvolopament Economic deth Conselh Generau d’Aran, a volut arrebrembar qu’aguest increment de toristes, ei conseqüéncia dera qualitat dera aufèrta toristica globau qu’aufrís era Val d’Aran , en çò que tanh a servicis, activitats complementàries ara practica der esquí , e ena categoria de totes es sues infrastructures toristiques, que hèn que sigue arreconeishut per tot coma ua destinacion toristica de prumèra linha, e ath que tanben an contribuït en bona part as reconeishences qu’enes darrèri tempsi a arrecebut era Val d’Aran, que destaquen entre eth, era destinacion sostenible Biosphere autrejada peth Global Sustainable Tourism Council dera Fundación Naciones Unidas, finalista enes Destination Leadership autrejadi pera National Geographic Society e era ITB de Berlin; o mès recentaments eth quau acredite ara Val d’Aran coma Destinacion Toristica intelligenta (DTI) arrecebut ena edicion d’aguest 2016 dera Hèira Internacionau deth Torisme- FITUR.