Balanç positiu des servicis publics aranesi pendent es hèstes de Nadau

  • Eth Conselh Generau d’Aran arregraís eth gran esfòrç qu’an agut de hèr es professionaus des diferents servicis publics pendent aguesti dies, enes que s’a experimentat un increment important deth volum de trabalh a afrontar

  • Eth govèrn deth Conselh Generau d’Aran trabalhe tanben enes diuèrsi aspèctes d’aguesti servicis publics qu’an de besonh ua melhora o reajustament

Era Val d’Aran a barrat ues hèstes de Nadau damb ua ocupacion extraordinària e superior ara des darrèri ans, çò que signifique un aument fòrça considerable deth volum de trabalh qu’an auut d’afrontar es servicis publics aranesi, coma eth servici de recuelhuda de lordères o era atencion sanitària.

En çò que tanh ara remassada de residus, eth govèrn deth Conselh Generau d’Aran ei conscient que i a auut moments puntuaus a on es punts de remassada s’an saturat pr’amor dera gran afluéncia de visitants, e que i a auut moments de non poder absorbir damb inmediatesa er increment de produccion a despièch de remassar-les dus còps ath dia. Tot e atau, eth govèrn aranés hè ua lectura optimista deth foncionament deth servici en aguestes dates, pr’amor qu’era remassada de rèsta e organica s’a atengut damb agilitat en tot esvitar-se en grana mesura imatges coma es que s’auien produsit en d’autes epòques.

Eth conselhèr de Territòri, Paisatge e Gestion ambientau, Oriol Sala, afirme que “des deth Conselh continuaram trabalhant entà aufrir ara nòsta ciutadania eth servici que meriten, mès tanben mos cau demanar eth maxim civisme e compromís, pr’amor que sense era collaboracion de toti e totes, non poderam arténher un servici de remassada de lordères òptim”. E hig que “non podem desbrembar qu’auem un servici dessenhat entà dètz mil persones e que n’aguestes epòques, era Val d’Aran multiplique per quate era sua populacion”.

Per ua auta part, er Espitau Val d’Aran a patit tanben un increment important dera sua activitat, sustot per çò que hè ath servici d’urgéncies.

Entre es dies 25 de deseme e 6 de gèr, es urgències atengudes an estat  1.098, ei a díder, ua mieja de 84,4 pacients ath dia. Eth dia damb mès assisténcies siguec eth 30 de deseme damb 103 pacients.

Eth totau d’ambulàncies rebudes per part de Pompièrs-Emergéncies a estat de 101, ei a díder, 7,7 ambulàncies ath dia as que cau híger es 3 o 4 ambulàncies diaries qu’arribauen des dera Alta Ribagorça.

Era conselhèra d’Igualtat, Salut e Benèster, Maria Vergés, a volut “arregrair eth gran esfòrç realizat per part deth personau sanitari pendent aguestes dates de tanta afluéncia” e a manifestat qu’aguestes donades “meten de relèu es besonhs qu’a era nòsta sanitat e enes quaus eth govèrn deth Conselh Generau d’Aran trabalhe des deth prumèr dia”.

Comments are closed.