Balanç positiu deth servici de remassada de residus pendent er ostiu

  • Enguan, pendent es mesi de junh e seteme, s’an registrat es donades mès nautes de remassada de residus des darrèri ans, en tot incrementar-se en un 10,5% respècte ar an anterior

  • Eth govèrn deth Conselh Generau d’Aran hè ua lectura optimista deth foncionament d’aguest servici e contunharà trabalhant entà melhorar en aguest airau

Era Val d’Aran a barrat er ostiu damb melhors donades d’acupacion des darrèri ans, çò qu’a significat un aument fòrça considerable deth volum de residus que s’an generat en nòste territòri pendent es mesi de junh, junhsèga, agost e seteme, ua chifra qu’ascendís enguan a un totau de 2.194 tones, un increment deth 10,5% respècte ar an anterior, en quau se remassèren un totau de 1.986 tones de residus. Per çò que hè a 2019 se remassèren 2.107 tones, mentre qu’en 2018 se’n remassèren 2.100 tones, çò que represente un increment respècte a enguan d’un 4% e un 4,5% respectivament.

“Enguan auem viscut un aument important en volum de produccion de lordèra respècte a ans anteriors e èm conscients qu’en moments puntuaus e en punts concrèts s’a patit bèra saturacion, totun deth Conselh Generau d’Aran ençà hèm ua lectura optimista deth foncionament deth servici de remassada e volem arregraïr as trabalhadors d’aguest servici eth sòn prètzhèt”, afirmaue eth conselhèr de Territòri, Paisatge e Gestion ambientau, Oriol Sala, en tot híger que: “eth govèrn aranés contunharà trabalhant entà aufrir ara nòsta ciutadania eth servici que meriten, mès tanben mos cau demanar eth maxim civisme e compromís, pr’amor que sense era collaboracion de toti e totes, non poderam arténher un servici de remassada de lordères òptim”.

Des 2.194 tones de residus remassades, 1.674 tones an estat de rèsta (deuant es 1.526 tones remassades en 2020, 1.623 en 2019 e 1.650 en 2018), 199 tones an estat de veire (194 en 2020, 179 en 2019 e 140 en 2018) e 158 tones de carton (deuant es 125 remassades en 2020, 172 en 2019 e 159 en 2018).

S’a experimentat un aument fòrça considerable ena remassada d’envasi, qu’an aumentat a 90 tones deuant des 72 tones remassades en 2020, 45 en 2019 e 61 en 2018. Totun, a despièch qu’enguan s’a produsit un aument de remassada d’organica respècte ar an anterior, en tot remassar 73 tones deuant es 69 de 2020, aguesta chifra ei inferior as de 2019 e 2018, ans enes que se remassèren 89 tones d’aguesta fraccion.

Comments are closed.