Era prumèra carrèra dera Copa d’Espanha Mastèrs (esquiadors damb mès de 30 ans) destinada tant a corredors damb licéncia federatiua coma as de categoria Open se disputarà era dimenjada deth 14 e 15 de gèr en Stadium de Beret.
Fòrça des esquiadors que s’inscriuen en carrères de mastèrs son ex-corredors mès tanben esquiadors de torisme que vòlen provar era competicion. Mès, çò que mès anime ad aguesti esportistes ei eth gran ambient que se viu en aguesti eveniments, tant a nivèu de companhs coma era hèsta que s’organize.
Entà perméter a tot eth mon experimentar eth rèpte dera competicion, aguesta carrèra organizada pera RFEDI, CAEI e AC- Otèls en Baqueira Beret a tanben ua categoria Open, tant en gigant eth dissabte coma en slalom deth dimenge, entàs esquiadors sense licéncia de corredor que vòlen experimentar çò qué se sent en competicion.
Eth gigant se disputarà eth dissabte 14 e s’installarà ena zòna de mèta un “hospitality” entà animar er ambient damb musica, aperitiu e ua tòia de dimenjades en lotjaments AC-Otèls dera peninsula. Eth liurament de prèmis deth GS se harà tàs 19:00 ores deth dissabte en Otèl AC Baqueira des Galaries de Ruda e s’acompanharà er eveniment damb ua copa de cava aufrida pera cadea otelèra. Eth dimenge 15 se disputarà eth slalom e eth liurament de prèmis se harà en finalizar era carrèra ena zòna de mèta.
Aguesta carrèra de Baqueira hè part dera Copa d’Espanha Mastèrs amassa damb tres dimenjades mès en Navacerrada, Formigal e Sierra Nevada. Es guanhadors deth circuit damb licéncia auràn ua ajuda entà anar en ostiu tara Casa d’Espanha dera RFEDI ena estacion soïssa de Saas Fee entà entrenaments de pretemporada.
Com s’organizen es categories?
Era categoria de Mastèrs s’inície as 30 ans e s’organize per edats de 5 ans, e de 10 ans entara Copa Espanha: es neishudi entre eth 1985 e 1976 e successivaments enquias neishudi en 1945 o anterior, majors de 70 ans.
Se pòt consultar eth programa dera carrèra deth IIau Trofèu Mastèr AC-Otèls CAEI en http://bit.ly/2jrS1hy
Es inscripcions se pòden hèr enquiath 12 de gèr es Open a trauès deth CAEI en tot picar ath 973.64.20.57 o enviant un corrèu electronic a inscripciones@caei.es
Vielha, 11 de gèr de 2017
Conselh Generau d’Aran: Núria Sanjuan
Hònt: Baqueira Beret