• Aguest contracte inclodís diuèrsi trams des carretères N-141 e N-230 ath sòn pas pera Val d’Aran: N-141, de Bossòst a la frontèra damb França; N-230, deth km 116 ath 163 ath cant de Pònt de Suert, enquiath km 187 ena frontèra damb França.

• Damb aguestes intervencions se balhe tanben responsa ara reclamacion dera melhora urgenta dera seguretat especiauments ena N-230, mès enlà des compromisi dejà adquiridi entar acondicionament d’aguesta carretèra que dejà se trapen en fasa de redaccion e licitacion segontes es trams.

Eth Ministèri de Transpòrts e Mobilitat Sostenibla d’Espanha a adjudicat un contracte per un impòrt de 18,1 milions d’euros (IVA includit) entara conservacion de carretères der Estat ena província de Lhèida damb ua durada iniciau de tres ans. 

Es intervencions previstes includissen era vigilància e atencion d’accidents, era vialitat iuernau, eth contròl des tunèls e comunicacions, e tanben eth mantenement des installacions ena N-141, de Bossòst enquiara frontèra damb França peth pòrt deth Portilhon, ena N-230, deth km 116,163 (apròp deth Pònt de Suert) enquiath km 187, ena frontèra damb França. Tanben ena N-260, a compdar dera connexion damb era N-230 enquiath limit damb era província de Huesca. 

Aguesta adjudicacion tanben includís era execucion de trabalhs de repintatge des parets lateraus deth tunèl Juan Carlos I, ena N-230 en Vielha, coma part des milhores ena infraestructura. 

Entara sindica d’Aran, Maria Vergés: “aguestes intervencions son un prumèr pas entà balhar responsa ara reclamacion qu’eth govèrn d’Aran a amiat a tèrme entà que se realizen accions urgentes tà melhorar era seguretat especiauments ena N230”.

Aguestes actuacions se higen as diuèrses licitacions de projèctes e adjudicacions d’òbres d’acondicionament ena N230 dejà anonciadi peth pròpri Ministèri que permeteran era melhora e adequacion d’aguesta via. 

Vielha, 11 de junhsèga de 2025