• Era Audiovisuau de Vielha acuelherà es dies 23 e 24 d’octobre era IIau edicion deth Congrès de ciberseguretat entà persones expèrtes deth sector.

• Tanben, en motiu dera setmana dera ciberseguretat, eth centre d’innovacion territoriau HèPIC, deth Conselh Generau, organize activitats entà tota era ciutadania.

Damb era bona acuelhuda dera prumèra edicion, Aran se convertís un an mès en lòc de trobada de professionaus especializadi en ciberseguretat en aguesta dusau edicion deth Congrès Armari 6, que s’amiarà a tèrme es dies 23 e 24 d’octobre.

Des dera supercomputacion, en tot passar pes modèls d’intelligéncia artificiau, enquiara criptografia pòst-quantica e era geopolitica. Enguan er objectiu d’aguest eveniment ei poder èster ath dia de totes es nauetats e darrères tendéncies, pr’amor qu’en airau dera ciberseguretat era evolucion ei constanta e presente naui rèptes.

Ei per açò que prepausam un format fòrça interactiu e dinamic damb era audiéncia, damb taules redones, ponéncies e debats entre expèrts de naut nivèu que meteràn en comun es estratègies mès actuaus entà hèr front as ciberatacs. En paraules deth conselhèr d’Innovacion, Oriol Sala: “En departament d’Innovacion, auem era volontat de hèr arribar coneishement puntèr en ciberseguretat enes territòris de montanha, pr’amor qu’ei un ahèr que dejà mos afècte a tota era populacion damb es panatòris de donades e es ciberestafes”.

Entà acabar, barrarà er acte Karina Gibert, doctora en informatica e catedratica dera Universitat Politecnica de Catalunya, qu’aguesta setmana passada recebec era medalha d’aunor dera Generalitat pr’amor eth sòn papèr coma referent en desvolopament dera intelligéncia artificau etica e responsabla.

Mès a mès, laguens deth congrès, s’a organizat era setmana dera ciberseguretat, en motiu dera quau se realizarà un scape room entar alumnat de 2au d’ESO der Institut d’Aran eth deluns 20 d’octobre. E entà tota era ciutadania, se harà un talhèr eth dimèrcles 22 tàs 19 ores a on apréner coma detectar e evitar es ciberestafes de manèra practica. E entara joenessa, dijaus peth maitin aurà lòc un talhèr sus deepfake damb eth quau saberàn identificar notícies, videos e imatges irreaus.

Aguest eveniment, organizat peth centre d’innovacion territoriau, HèPic, deth Conselh Generau d’Aran, damb eth supòrt deth Ministeri de Transicion Energetica e Rèpte Demografic, era Deputacion de Lleida, er IDAPA e era UPC, aufrís ua proximitat unica damb fòrça moments entà poder debàter, conversar e compartir sus ciberseguretat. E tanben, damb diferentes activitats complementàries ath long dera dimenjada restacades damb eth desvolopament des naues tecnologies ena Val d’Aran.

Vielha, 7 d’octobre de 2025