- Eth Conselh Generau d’Aran, a trauès des sòns servicis de salut (Aran Salut) signèc en 2010 era aliança estrategica damb eth Hospital del Mar de Barcelona, qu’a permetut qu’era Val d’Aran compde damb servicis sanitaris de nauta especializacion, com era oncologia entre d’auti, e damb especialistes de prumèr nivèu que trabalhen amassa damb es professionaus deth sistèma de salut aranés.
- Entà hestejar er efemerid, aguest diuendres s’a organizat ua jornada de trabalh amassa qu’a servit tanben entà reconéisher e arregraïr eth compromís deth Hospital del Mar e de toti es professionaus, tant es d’aguest centre com es d’Aran Salut, entà arténher ua milhora dera qualitat des servicis e era atencion as pacients.
En 2010, eth Conselh Generau d’Aran, a trauès d’Aran Salut, signèc ua aliança estrategica damb eth Hospital del Mar, qu’a permetut qu’ath long d’aguesti 15 ans eth sistèma integrat de benèster e salut aranés pogue compdar damb eth supòrt e collaboracion damb Aran Mar en diuèrsi airaus.
Per aguest motiu, entà hestejar es 5 ans d’ua aliança qu’a permetut ua milhora evidenta ena evolucion des servicis e tractaments qu’er Espitau aufrís as pacients en tot aguest temps, s’a organizat ua jornada a on, entre d’autes causes, se hè era presentacion d’un video commemoratiu que mòstre eth trabalh conjunt deth dia a dia.
Ara seguida s’a presentat er estudi d’avaloracion der IDIAP, elaborat per Institut Universitari d’Investigacion en Atencion Primària-Jordi Gol.
Pendent eth maitin i a agut dus blòcs tematics damb taules redones. Eth prumèr, damb especialistes, pacients e familiars, qu’an debatut sus es sues experiéncies damb es diuèrsi tractaments/malauties. E un dusau, sus era umanizacion e integracion deth mon sociau e sanitari, damb experiéncies concrètes damb mètges e metgesses.
Era directora deth SABS, Ma Àngels Borràs, a soslinhat que “aquesta aliança estrategica a milhorat era accessibilitat des aranesi e araneses ara atencion especializada, a complementat era nòsta aufèrta de servicis e a apropat ath territòri naues especialitats e tractaments”, e a hijut que “s’a fomentat eth trebalh en equipa entre es profesionaus des dues institucions damb un resultat fòrça satisfactòri”.
“Ua des hites mès remercables d’aguesta aliança ei auer artenhut qu’er Espitau Val d’Aran compde damb un servici d’oncologia, coordinat peth madeish Hospital del Mar tanben damb professionaus aranesi, qu’a servit entà milhorar substanciauments era qualitat de vida des pacients e desplaçaments dehòra d’Aran”.
Eth Director Gerent de l’Hospital del Mar, Jaume Raventós, a volgut restacar “era importància deth trebalh conjunt entà portar era nòsta experiéncia as ciutadans e ciutadanes dera Val d’Aran”.
Era sindica d’Aran, Maria Vergés, a manifestat ath torn d’aguesta celebracion que: “eth Govèrn d’Aran a un compromís clar e fèrm entà qu’era ciutadania aranesa compde damb es milhors servicis publics possibles, especiauments damb aqueri qu’an a veir damb era salut e eth benèster, d’aquiu era origina d’aguesta aliança, tara que voi tanben arregraïr era volontat deth Hospital del Mar entà mantier-la pendent aguesti 15 ans”. Atau madeish, a hijut que “er èxit d’aguesta aliança ei frut deth compromís des professionaus d’Aran Salut e deth Parc de Salut Mar, gràcies ath sòn trabalh en equipa, e qu’a despiet dera distància, auem podut auançar e milhorar coma sistèma e a consolidar aguesta estructura”.
Vielha, 07 de noveme de 2025