• Eth Plen deth Conselh Generau d’Aran a aprovat en session extraordinària aguest maitin eth pressupòst dera maxima institucion entad aguest 2026 damb ua quantitat de 49 milions d’euros.

• Era partida economica mès importanta ei era assignada ath Departament de Salut e Benèster, que damb 23.951.000€ a un increment de 1,6 milions d’euros entà contractar professionaus e tara atencion farmacologica, entre d’auti, especiauments era derivada dera atencion oncologica.

• Se mantien es partides de collaboracion damb eth sector ramadèr e es entitats esportives e culturaus a trauès de convènis e acòrds. 

Per çò que hè ar encastre de Territòri, Ramaderia e Miei Ambient, se mantieràn es ajudes tath bestiar non retornat e tath bestiar despareishut coma conseqüéncia dera conviuença damb grani carnivors. Atau madeish s’a prevista ua partida de 40.000 € tar impuls des trabalhs forestaus en centre logistic de biomassa plaçat en Les.

Es partides en matèria de torisme passen peth compliment deth convèni damb era Agència de Turisme de Catalunya damb ua dotacion de 22.000€ e era partida destinada ath convèni entre Baquèira e eth CGA entà promocion toristica enes des oficines plaçades en Tolosa e Madrid, de 25.000 cadua.

En encastre dera gestion ambientau destaque era partida de 50.000 euros entath Plan de Gestion deth Paisatge e Proteccion des Pòbles qu’impulse eth Conselh Generau d’Aran.

En matèria de sanejament s’assigne ua partida d’estudi e trabalhs tecnics entara redaccion des projèctes des EDAR de Canejan e Bagergue, finançadi tanben pera ACA.

A destacar era partida corresponenta ath convèni damb eth Ministeri de Transicion Energetica e Rèpte Demografic entar impuls dera Innovacion.

Entara sindica d’Aran, Maria Vergés: “aguest pressupòst respon ara volontat deth Govèrn d’Aran entà consolidar es servicis publics en nòste territòri a trauès deth desplegament der autogovèrn aranés” en tot híger que “èm tanben ara demora dera aprobacion de pressupòsti per part dera Generalitat entà poder incorporar partides referentes arna melhora de traspassi e as auanci que i age respècte deth nau modèl de finançament”.

Vielha, 27 de març de 2026