• Damb aguest convèni eth Conselh Generau d’Aran assomís era gestion, conservacion, dinamizacion e promocion toristica d’aguesti elements patrimoniaus e hèr es inversions de besonh tà meter-les en valor.

• Enes pròplèu mesi eth govèrn d’Aran amiarà a tèrme eth projècte de musealizacion deth Castèth de Les (BCIN), damb un còst aproximat de 100.000 euros, en tot completar atau es trabalhs de reabilitacion e revalorizacion d’aguest edifici istoric de grana importància patrimoniau entara Val d’Aran en generau e eth Baish Aran en particular.

Aguest maitin a auut lòc, ena sedença dera maxima institucion aranesa, era signatura per part dera sindica d’Aran, Maria Vergés, e deth baile de Les, Andreu Cortés, deth convèni de collaboracion entre eth Conselh Generau d’Aran e er Ajuntament de Les tara inclosion deth musèu “Casa deth Haro. Musèu des Hèstes deth Huec” e deth Castèth de Les e es sòns entorns en Hilat de Musèus dera Val d’Aran entara sua gestions.

Damb aguest acòrd Conselh Generau d’Aran assumís era direccion tecnica e coordinacion des equipaments, e tanben es despenes de foncionament, personau e activitats, e susvelharà era aplicacion dera normativa vigenta en matèria de musèus, patrimòni e arqueologia. Atau madeish, elaborarà es materiaus divulgatius en diuèrses lengües e formats, se n’encuedarà dera comunicacion e promocion, e definirà es tarifes e es accions deth plan estrategic.

Er Ajuntament de Les, peth sòn costat, se responsabilizarà dera neteja ordinària dera Casa deth Haro, dera conservacion des camins d’accès, e dera illuminacion deth Castèth. Tanben collaborarà ena dignificacion e adequacion des entorns des dus equipaments.

Eth seguiment e evaluacion deth convèni se harà a trauès d’ua comission paritària que tractarà es inversions, eth foncionament ordinari e totes es qüestions que contribuïsquen ath bon foncionament des equipaments.

Eth Conselh Generau d’Aran dejà hec ua aportacion de 125.000€ ena prumèra fasa de reabilitacion deth Castèth de Les, ues òbres qu’aueren un còst totau de 321.000€. N’aguest sens, ara se daurís era dusau fasa d’aguestes òbres que comprenerà era musealizacion de tot aguest espaci, un projècte que, en prumèra instància, se prevé qu’aurà un còst d’uns 100.000€ qu’assomirà eth pròpri Conselh Generau d’Aran. Atau madeish, se trabalhe dejà ena museografia deth nau espaci dera Casa deth Haro (Musèu des hèstes deth huec), qu’assomís tanben damb finançament parciau deth Departament de Cultura dera Generalitat de Catalunya.

Entara sindica d’Aran, Maria Vergés “damb aguest acòrd permetem era contunhitat d’un projècte plan important coma ei era metuda en valor e promocion deth nòste auviatge, n’aguest cas en Les damb eth sòn castèth, declarat Ben d’Interès Culturau Nacionau e deth madeish Musèu der Haro. Dus elements identitaris e referents deth patrimòni aranés, ath delà de recorsi toristics e de dinamizacion socioeconomica de prumèr nivèu, tà Les e tot eth Baish Aran”, e a volut destacar que ”eth govèrn d’Aran manten era volontat de collaborar damb toti es municipis aranesi entà preservar e difóner eth nòste patrimòni coma element indispensable entà, non sonque sauvar era nòsta identitat, se non tà impulsar era economia deth territòri” e higie que “eth convèni damb er Ajuntament de Les ei un exemple de coma, se i a volontat, se pòden arribar a acòrds que beneficien ara ciutadania”.

Vielha, 18 de junhsèga 2025