• Dempús dera amortada dera passada setmana, eth govèrn d’Aran a convocat aguesta trobada entà tractar damb es Ajuntaments sus es Plans de Proteccion Civila e era sua aplicacion e, atau madeish, entà definir eth marc de coordinacion practic e efectiu entre totes es administracions en cas d’ua emergéncia, en tot revisar es actuaus protocòls e definir es plans d’accion tà assegurar eth benèster dera ciutadania d’Aran.

Era sindica d’Aran, Maria Vergés, acompanhada de representants de Pompièrs Emergéncies e der airau de sistèmes e comunicacion deth Conselh Generau d’Aran, s’a amassat aguest maitin damb es alcaldes e alcaldeses dera Val d’Aran, entà tractar sus era coordinacion entre andues administracions en cas d’ua emergéncia dempús de çò viscut damb era amortada dera passada setmana.

N’aguest sens, era sindica d’Aran, a trasladat as representants des ajuntaments eth besonh de consensuar un marc de trabalh e coordinacion tà definir accions conjuntes ara ora d’atier ara ciutadaneitat en cas d’emergéncies. Atau donc, qüestions coma assegurar es comunicacions a trauès des sistèmes d’emisores o de connexions satelitaus o establir endrets d’informacion e emergéncia en cas de besonh en cada pòble, an estat ahèrs que s’an debatut ena amassada, atau coma tanben hèr a arribar tota aguesta informacion ara ciutadania entà que sàpien a on e coma adreçar-se en cas d’emergéncia.

Es responsables de Pompièrs Emergéncies an repassat es protocòl d’actuacion actuaus e ellaboraran un document que remasse, damb era informacion que receben des Ajuntaments, toti es elements de supòrt e acuelh qu’es municipis an a disposicion.

Maria Vergés, sindica d’Aran a manifestat que “damb aguesta prumèra trobada ja auem podut hèr un brolhon des besonhs mès immediati e mos auem emplaçat a mantier-ne d’autes de tipe mès tecnic que permeten, a trauès de Pompièrs Emergéncies, amiar a tèrme formacion tà emplegar es elements de comunicacion o inclús poder realizar quauque simulacre d’actuacion” en tot manifestar er arregraïment pera predisposicion des municipis a trabalhar conjuntament entà garantir era seguretat dera ciutadania.

Vielha, 06 de mai 2025