• Organizat peth Conselh Generau d’Aran, a trauès de Hèpic, eth Centre d’Innovacion Territoriau d’Aran, damb eth supòrt dera Agència de Ciberseguretat de Catalunya, a amassat a mès de 120 assistents expèrts en ciberseguretat.

Es dies 23 e 24 d’octobre, era Audiovisuau de Vielha acuelhec era dusau edicion deth Congrès de Ciberseguretat “Armari 6”, damb er objectiu de méter-se ath dia e que toti es assistents der eveniment se’n tornèssen tà casa damb un recuelh clar des darrères tecnologies e estrategies entà afrontar es principaus amenaces en ciberseguretat.

En un format que se distingís de totes es autes trobades d’especialistes deth sector, e que se concentren enes principaus pòls tecnologics urbans, Aran aufrís un espaci de proximitat entà poder reflexionar e debàter. Combinant es ponéncies damb es taules redones, convèrses e debats e, sustot, daurint eth torn de qüestions deth public en totes es intervencions entà compartir diuèrsi punts de vista, reflexions e resòlver dubtes. Tot, damb eth propòsit d’intercambiar coneishements e bastir amassa bones practiques a implementar enes sues entitats, enterpreses o institucions.

Arrinquèrem dijaus damb ua analisi comparativa des longui modèls de lenguatge (LLM) d’intelligéncia artificiau damb Jordi Murgó, era supercomputacion aplicada ara ciberseguretat dera man d’Àlex Guasch, e ua taula redona sus coma es professionaus gestionen era ciberseguretat enes territòris ruraus per part de Roger Garray, Rossend Rocamora e Xavi Lladós. E finalizèrem, damb ua interessanta convèrsa sus era importància e papèr des CISOs enes enterpreses entre Núria Parés e Justine Rexer e, ua ponéncia d’Abel Pozo sus es dispositius IOT/OT enes entorns industriaus e productius.

Londeman, eth diuendres, comencèrem parlant dera ciberseguretat enes conflictes armats damb Carlos Fragoso e entenérem es rèptes que supause era criptografia pòstquantica damb Oriol Farràs. Ara seguida, representants des granes institucions nacionaus: Laura Caballero, directora dera Agència de ciberseguretat de Catalunya, Jordi Ubach, responsable dera Agència de ciberseguretat d’Andorra e Héctor Estrada, responsable de RETECH der INCIBE mos meteren ath dia der estat actuau dera ciberseguretat.

Contunhèrem descorbint qué mos depararà eth futur damb un debat entre era expèrta Rosa Ortuño e eth professor Josep Pegueroles, e escotèrem es caracteristiques pròpries qu’a era ciberseguretat en çò que tanh ara salut damb Olga Leon, Eva Jorquera e Arantxa Gabas. Barrèrem er acte, damb ua ponéncia sus era intelligéncia artificiau responsabla e etica dera man de Karina Gibert, recentament guerdonada damb era medalha d’aunor deth Parlament de Catalunya.

Entà acabar, era clausura der eveniment siguec realizada pes caps d’innovacion deth Conselh Generau d’Aran: Guillem Piris e Sergio López, e era tecnica, Clara Estrada que dèren es gràcies as ponents, moderadors/es e as assistents.

Un viatge finalizat eth programa oficiau deth congrès, s’an amiat a tèrme activitats pendent era dimenjada damb era presentacion deth projècte innovador satellitau de Hispasat aprofitant entà visitar diuèrsi endrets emblematics dera Val d’Aran.

Vielha, 29  d’octobre de 2025