• Es dus esquiaires dera RFEDI se proclamèren campions dera darrèra pròva disputada enes Campionats d’Espanha.

• Eth gigant (GS) que se celebrèc en Stadium de Beret siguec era darrèra carrèra FIS entà Carolina Ruiz, que se comiadèc de toti es futurs esquiaires.

• Deth 29 ath 31 de març, era estacion dera Val d’Aran, Baqueira Beret, acuelhec es Campionats d’Espanha d’esquí aupin que compdèren damb era preséncia des melhors esquiaires espanhòus.

Er aranés, Alex Puente, campion d’Espanha de gigant en Baqueira Beret

Eth dimars, 30 de març, se disputèc era tresau e darrèra pròva des Campionats d’Espanha d’esquí aupin organizat pera Reau Federacion Espanhòus Espòrts d’Iuèrn (RFEDI), amassa damb era Federacion Catalana Espòrts d’Iuèrn (FCEH), eth Conselh Generau d’Aran, er Ajuntament Naut Aran e era estacion de Baqueira Beret, entre autes institucions.

Era pròva, que se disputèc en Stadium de Beret, se podec disputar segons eth previst e jos ua meteorologia esplendida que se mantenguec pendent tota era competicion. Eth GS damb gessuda a 2.211m e arribada 1.860m, compdaue damb 48 pòrtes ena categoria masculina e 47, ena femenina.

Alex Puente: “aué auie ua motivacion extra e a anat ben”

Eth corredor aranés, component dera estructura RFEDI e dera Equipa Steffen-S1, se palcèc prumèr damb ua diferéncia de -1.27 centaus. Er aranés, que somèc 2:19.20 enes dues manges, asseguraue èster “fòrça content de guanhar en casa e ath delà ja auie desir, dempús de hèr dus argents en SG e era SL. Aué auie ua motivacion extra e, per sòrt, a anat ben.” Ath delà, ahigec “eth hèt d’èster en casa, era Val d’Aran, a jo me lhèue pression e me motive mès, veir as tòns e conéisher ara gent”. Per çò qu’ei dera sason, Puente la resumic damb ua paraula: “irregularitat”. Expliquèc que “jamès m’an gessut dues manges ath nivèu que creigui pogui hè’c e encara me demore bèra carrèra, a veir se pogui baishar bèth punt e acabar era sason damb uns punts mès conseqüents damb eth mèn esquí”. De cara ar an que ven “non sabi a on serè, a veir se mos hèn bèra prepausa e podem hèr ja un saut de qualitat e començar a anar tara Copa d’Euròpa e jogar-les-i totes en aguest mon.”

Eth dusau lòc siguec entà Pol Carreras, tanben corredor RFEDI, qu’anèc 3au en SL deth deluns, que finalizèc es dues manges damb un temps de 2:20.47. Eth bronze siguec entath corredor catalan, Pol Rocamora, que completèc es dues manges damb un totau de 2:21:80

Carolina Ruiz, ua des melhores esquiaires der espòrt espanhòu, se comiade

Era esquiaira de Sierra Nevada, se proclamèc campiona d’Espanha de GS damb un temps totau de 2:25.73. Ruiz, dempús dera sua victòria explicaue que “sabie qu’eth gigant serie mès malaisit e que se volie guanhar li calie riscar un shinhau, causa qu’è hèt e ara fin m’a gessut ben”. Aguesta ère era darrèra pròva entara granadina e en finalizar sentie satisfaccion, “coma tostemp e dit, non toti an era sòrt de poder escuélher en coma e quan acabar damb era sua carrèra esportiua e jo ac hí. Escuelhí era Copa deth Mon de Meribel, qu’ei era pista que mès m’agradaue e en Espanha, es Campionats Nacionaus, atau que sò fòrça contenta”.

Era tanben componenta dera RFEDI, Núria Pau, tornèc a pujar ath pòdi. Era esquiaira catalana, qu’eth deluns siguec prumèra en eslalom, hec eth dusau melhor temps eth çò de gigant, a sonque +0.46 dera guanhadora e damb un crono finau de 2:26:19. Eth tresau lòc siguec entara sua companha d’equipa, Júlia Bargalló, que finalizèc es dues manges damb 2:27:19. Era esquiaira dera Val d’Aran siguec present en toti es pòdis des campionats, anèc 3aua en SG e 2aua en SL.

Aureli Bisbe, president executiu de Baqueira Beret e dera Associacion Toristica Espanhòla d’Estacions d’Esquí e Montanha (ATUDEM), hec un balanç positiu d’aguesti Campionats d’Espanha e assegurèc qu’a Baqueira Beret “èm fòrça contenti d’auer a tanti corredors boni en tot hèr concurréncia ena sua estacion”. S’a trabalhat fòrça e era estacion aranesa manten era sua fidelitat ara competicion. Per açò, contunhe apostant per naues pistes e mantenença entàs clubs, com a estat era adaptacion dera pista Dossau a on se disputèc eth supèr gigant deth dimenge o eth Stadium Beret- Fernández Ochoa e eth nau remontador deth madeish estadi, e que pòga pòc da un servici mès ample ara competicion.

Pera sua banda, eth president dera RFEDI, May Peus, destaquèc qu’”en tot pensar ena promocion der espòrt a estat fòrça positiva era nauta participacion enes Cts. d’Espanha damb mès de 200 esquiaires, era majoria de categoria juvenila e damb era preséncia de toti es centres de tecnificacion d’Espanha”. D’auta banda, Peus auec ues paraules d’arregraïment cap a Carolina Ruiz, e ne destaquèc qu’ “a estat un referent des espòrts d’iuèrn e mès que mès dera velocitat e sò segur qu’encara li cau aportar fòrça ar esquí espanhòu en futur”.

Eth futur der esquí espanhòu, segons Carolina Ruiz

Carolina Ruiz, ara qu’a metut fin ara sua carrèra esportiua a dat era sua avaloracion per çò qu’ei deth futur der esquí espanhòu. A explicat qu’ “ara calerà trabalhar plan en esquí de basa, mès segur que se pòt arribar naut, coma è arribat jo e non sò era unica espanhòla”, e seguic “non è agut un tracte diferent ath de arrés, simplaments qu’es moments claus è agut era sòrt d’auer era gent justa apròp, sustot ara mia familha”.

Era situacion actuau, segons Ruiz, “creigui qu’ara cau èster realistes, en Espanha i aurà un uet gran mès eth ben que i a en açò ei que se comence a trabalhar damb era basa” e ahigec “i a fòrça basa, fòrça gojats e gojates damb potenciau e creigui qu’en tot auer un shinhau de paciéncia s’arribarà un aute viatge en auer grani campions”.

Ruiz, qu’a estat 17 ans enes equipes dera Reau Federacion Espanhòla Espòrts d’Iuèrn, assegure que “damb era naua Federacion e en tot guardar eth futur s’a començat ua bona estapa”. Expliquèc qu’ “ei fòrça recent mès es petiti cambiaments que i a agut enquiara son fòrça positius e mos an deishat clar tanben era linha ena quau se trabalhe e ei ua linha que jo compartisqui e me da fòrça confidança”. Animèc ara RFEDI a seguir en tot lutar “demori que se seguisque d’aguesta forma e que laguens de pòqui ans se comencen a notar aguesti resultats”.